تحريڪ انصاف اڳواڻ فواد چوڌري چيو آهي ته پاڪستان ۾ عدالتي نظام کي مذاق بڻايو ويو آهي، آئين تحت سپريم ڪورٽ جو فيصلو قطعي ۽ 90 ڏينهن جي اندر چونڊون ٿيڻ لازمي آهن، حڪومت چاهي ٿي ته جيستائين هاڪاري نتيجو نٿو اچي چونڊون نه ٿين، موجوده حڪومت اليڪشن کان ڀڄي رهي آهي، ن ليگ جي سپريم ڪورٽ تي حملو ڪرڻ جي تاريخ رهي آهي، سپريم ڪورٽ جو فيصلو غلط به ٿي سگهي ٿو ته اهو فائنل فيصلو هوندو آهي.
لاهور ۾ ميڊيا سان ڳالهائيندي فواد چوڌري چيو ته پاڪستان ۾ عدالتي نظام کي مذاق بڻايو ويو آهي، هتي عدالت حڪم ڏيندي آهي ۽ عمل ناهي ٿيندو، آئين تحت سپريم ڪورٽ جو فيصلو قطعي آهي، ڪابه حڪومت فيصلو مڃڻ کان انڪار نٿي ڪري سگهي.
سندس چوڻ هو ته آئين تحت 90 ڏينهن جي اندر چونڊون ٿيڻ لازمي آهن، هو عدليا جي عزت جي جنگ وڙهي رهيا آهن، اڄ وڪيل معمول موجب عدالتن ۾ پيش ٿي رهيا آهن.
پي ٽي آءِ اڳواڻ فواد چوڌري چيو ته سڄو ملڪ سپريم ڪورٽ سان گڏ ٿي ڪري آئين لاءِ جدوجهد ڪندو، ن ليگ جي سپريم ڪورٽ تي حملو ڪرڻ جي تاريخ پراڻي آهي.
هن چيو ته موجوده حڪومت اليڪشن کان ڀڄي رهي آهي، ڳالهين جي دعوت وزيراعظم کي ڏيڻي آهي، ڳالهين لاءِ وفد بڻايو ويندو.
پي ٽي آءِ اڳواڻ فواد چوڌري چيو ته اظهر صديق جي گهر تي رات جو حملو ڪيو ويو سندس گهر تي پيٽرول بم اڇلايا ويا، اظهر کي ڊيڄارڻ جي ڪوشش ڪئي وئي.
