آمريڪي ڪانگريس جي ميمبر بريڊ شرمين چيو آهي ته آمريڪي پرڏيهي وزير انٽوني بلنڪن کي لکيل خط کي پي ٽي آءِ چيئرمين جي حمايت طور نه ڏٺو وڃي.
آمريڪي ميڊيا سان ڳالهائيندي بريڊ شرمين چيو ته عمران خان فون تي ٻڌايو ته هو آمريڪا مخالف ناهي ۽ هو قانون جي حڪمراني تي يقين رکي ٿو.
هن چيو ته پاڪستان ۾ سپريم ڪورٽ اليڪشن ڪرائڻ جو فيصلو ان وقت جاري ڪيو جڏهن سندس ۽ عمران خان وچ ۾ ڳالهه ٻولهه ٿي.
بريڊ شرمين چيو ته سماجي ويب سائٽن تي ماڻهو چئي رهيا آهن ته آمريڪي پرڏيهي وزير بلنڪن کي لکيل سندس خط عمران خان جي حمايت ۾ آهي.
آمريڪي ڪانگريس جي ميمبر چيو ته عمران خان پنهنجي حڪومت ڪيرائڻ جو الزام آمريڪا تي هنيو هو، هن عمران خان جي موقف تي تنقيد ڪئي، عمران خان پنهنجي الزام جو ڪو به ثبوت پيش نه ڪيو.
بريڊ شرمين چيو ته اهو به بلڪل واضح ٿي ويو آهي ته عمران خان جي حڪومت کي ڪيرائڻ لاءِ ڪانگريس ڪا رقم نه ڏني، عمران دور ۾پاڪستان ۾ ٿيل انساني حقن جي ڀڃڪڙين ۽ پرڏيهي پاليسي تي تنقيد ڪئي هئي.
