قانون واري وفاقي وزير، اعظم نذير تارڙ چيو آهي ته آڊيو ليڪ جي ڳالهه ٻولهه سنگين آهي، سپريم ڪورٽ ان جو نوٽيس وٺي، ڪجهه ماڻهن جي ڪوشش آهي ته ادارا هڪٻئي جي آمهون سامهون ٿين، اهڙو ڪم ڪيو وڃي، جيئن توهين عدالت ٿي وڃي، عدالتن کي سياسي معاملن ۾ احتياط ڪرڻ گهرجي، جڏهن به سياسي معاملا عدالت ۾ آيا ملڪ ۽ قوم جو نقصان ٿيو، ملڪي تاريخ ۾ پهريون ڀيرو قانون جاري ڪرڻ کان اڳ ان تي عمل روڪيو ويو.
لاهور ۾ ملڪ احمد خان سان گڏ پريس ڪانفرنس ڪندي اعظم نذير تارڙ چيو ته سياسي معاملن کي عدالت ۾ نه کڻي وڃڻ گهرجي، عدالت به گهڻن معاملن ۾ احتياط ڪري، عدالتن کي سياسي معاملن ۾ احتياط ڪرڻ گهرجي، جڏهن به سياسي معاملا عدالت ۾ آيا ملڪ ۽ قوم جو نقصان ٿيو.
هن چيو ته اڄڪلهه ٽيڪنالاجي ۽ هيڪنگ جو زمانو آهي، هڪ سينيئر وڪيل ۽ اڳوڻي چيف جسٽس جي آڊيو سامهون آئي آهي، سوشل ميڊيا جي جديد دور ۾ حقيقتن تي پردو نه ٿو وجهي سگهجي.
وفاقي وزير چيو ته ڪوشش ڪئي پئي وڃي ته عدالت ۽ پارليامينٽ آمهون سامهون ٿي وڃن، ڪجهه ماڻهو سياسي معاملا ڀڙڪائڻ جي ڪوشش ڪري رهيا آهن، اهڙو ڪم ڪيو وڃي جيئن توهين عدالت ٿي وڃي.
اعظم نذير تارڙ چيو ته پارليامينٽ کي آئين کليل اختيار ڏنا آهن، ملڪي تاريخ ۾ پهريون ڀيرو قانون جاري ڪرڻ کان اڳ ان تي عمل روڪيو ويو.
ن ليگ جي ملڪ احمد خان چيو ته اڳوڻي چيف جسٽس جي آڊيو سامهون آئي آهي، سپريم ڪورٽ کي ان جو نوٽيس وٺڻ گهرجي، آڊيو ۾ هڪ فيصلي جو حوالو ڏنو ويو آهي.
هن چيو ته سامهون آيل آڊيو بعد ڪيترائي سوال اٿي رهيا آهن، واضح ٿي رهيو آهي پارلياماني ڪارروائي کي ڪيئن روڪي سگهجي ٿو؟.
