وڏي وزير سيد مراد علي شاهه چيو آهي ته ادارن کي پنهنجي آئيني حدن ۾ رهي ڪم ڪرڻ گهرجي، مداخلت سان مسئلا پيدا ٿيندا، پي ٽي آءِ کي انا ڇڏي ملڪ لاءِ سوچڻ گهرجي.
وڏي وزير مراد علي شاهه جيڪب آباد ۾ ايم پي اي ممتاز جکراڻي جي امڙ ۽ صوبائي صلاحڪار اعجاز حسين جکراڻي سان چاچيءَ جي لاڏاڻي تي تعزيت ڪئي.
ان موقعي تي بعد ميڊيا سان ڳالهائيندي مراد علي شاهه چيو ته ملڪ ۾ آئين آهي جنهن ۾ هر اداري جي حد مقرر ٿيل آهي، جيڪڏھن هڪ ادارو ٻي اداري ۾ مداخلت ڪندو ته مسئلا پيدا ٿيندا.
هن چيو ته آئين ذوالفقار علي ڀٽو جو تحفو آهي ان تي عمل ٿيڻ گهرجي، پيپلزپارٽي ان جو تحفظ ڪيو آهي.
سندس چوڻ هو ته پي ٽي آءِ سمجهه کان ڪم وٺي پنهنجي انا هڪڙي پاسي رکي ملڪ لاءِ فيصلو ڪري.
مراد علي شاهه چيو ته آئين جي آرٽيڪل 63 اي ۾ آهي ته سي ايم يا پي ايم جي چونڊ ۾ ناراض ميمبر کي پارٽي مان نيڪالي ڏيڻ گهرجي.
هن چيو ته پنجاب ۽ ڪي پي اسيمبليون هڪڙي شخص جي انا خاطر ٽوڙيون ويون، پي ڊي ايم حڪومت جي اتحادين ۾ ڏار نه پوندو، سڀ پارٽين جا پنهنجا پنهنجا نظريه آهن.
سندس چوڻ هو ته ملڪ جي بهتري لاءِ آئين تي عمل ڪرڻ گهرجي، مشڪل وقت کان نڪرڻ جو هڪ ئي حل آهي اليڪشن ۾ حصو ورتو وڃي.
وڏي وزير چيو ته سنڌ پوليس ڪچي ۾ ڌاڙيلن جي خاتمي لاءِ ڪوششون ڪري پئي، پنجاب ۽ سنڌ ۾ ڌاڙيلن خلاف آپريشن جاري آهي، پلاننگ جوڙين پيا ته ڪچي ۾ ڌاڙيلن کي ملندڙ هٿيار بند ڪيا وڃن.
