ڀارت جي اڳوڻي ليجنڊري بيٽر سچن ٽنڊولڪر جي پٽ ارجن ٽنڊولڪر آخرڪار آءِ پي ايل ۾ ڊيبيو ڪري ورتو.
ارجن ٽنڊولڪر آچر ڏهاڙي ممبئي انڊينز جي نمائندگي ڪندي ڪولڪتا نائيٽ رائيڊرز خلاف آءِ پي ايل ڊيبيو ڪيو، هن ٻن اوورن ۾ وڪيٽ وٺڻ کانسواءِ 17رنسون ڏنيون.
آءِ پي ايل ۾ ڊيبيو سان گڏ ارجن ۽ سچن ٽنڊولڪر هڪ منفرد اعزاز حاصل ڪري ورتو، هو ڀارتي ٽي ٽوئنٽي ليگ کيڏندڙ پهريان پيءُ ۽ پٽ بڻجي ويا.
سچن ٽنڊولڪر 2008 کان 2013 جي وچ ۾ ممبئي انڊينز جي ئي نمائندگي ڪندي 78 ميچن ۾ 2هزار 334 رنسون ٺاهيون، جڏهن ته 51 ميچن ۾ ڪپتاني جا فرض سرانجام ڏنا.
پيءُ کانپوءِ هاڻي ارجن ٽنڊولڪر به آءِ پي ايل کيڏي رهيو آهي جنهن سان گڏ ئي آءِ پي ايل کيڏندڙ پهرين پيءُ ۽ پٽ جي جوڙي جو اعزاز به حاصل ڪيو.
پٽ جي آءِ پي ايل ۾ ڊيبيو ڪرڻ تي سچن ٽنڊولڪر ارجن جي لاءِ نيڪ خواهشن جو اظهار ڪيو ۽ جڏهن ته ڀارتي ڪرڪيٽرز طرفان به واڌايون ڏنيون ويون.
واضح رهي ته آچر ڏهاڙي کيڏي ويل ميچ ۾ ممبئي انڊينز ڪولڪتا نائيٽ رائيڊرز کي 5وڪيٽن تان شڪست ڏني هئي.
