اطلاعات واري صوبائي وزير شرجيل ميمڻ جسٽس قاضي فائز عيسيٰ تي تنقيد رد ڪندي چيو آهي ته جسٽس قاضي فائز عيسيٰ تي گڏيل اجلاس ۾ شرڪت ڪرڻ تي اعتراض اجايا آهن، گولڊن جوبلي تقريب ڪنهن ميدان نه پر پارليامينٽ ۾ ٿي آهي، پارليامينٽ کان وڌيڪ ٻيو ڪو به مقدس ادارو ناهي، عمران خان اڳوڻي چيف جسٽس ثاقب نثار سان ملاقاتون ڪندو رهيو آهي، سنڌ جي آبادي گهٽ ڏيکاري وئي ته سنڌ حڪومت قبول نه ڪندي
ڪراچي پريس ڪلب ۾ صحافين جي مان افطار ڊنر واري تقريب کي خطاب ڪندي شرجيل ميمڻ چيو ته پارليامينٽ جي گڏيل اجلاس ۾ سينئر ترين جج جي شرڪت فخر جوڳي ڳالهه آهي.
هن چيو ته اسرائيل ۽ ٻين ملڪن جي ايجنٽن سوشل ميڊيا تي اجائي واويلا ڪئي، ماضيءَ ۾ ثاقب نثار جي آفيس ۾ پي ٽي آءِ اڳواڻ ملندا هئا.
شرجيل ميمڻ چيو ته صحافين لاءِ هيلٿ ڪارڊ ضرور ڏنو ويندو پر سنڌ جي اسپتالن ۾ هر بيماريءَ جو مفت علاج ڪيو پيو وڃي.
هڪ سوال جي جواب ۾ صوبائي وزير چيو ته سنڌ جي آبادي گهٽ ڏيکاري وئي ته سنڌ سرڪار قبول نه ڪندي.
