اسلام آباد هائيڪورٽ، غيرقانوني فنڊنگ ڪيس ۾ عمران خان جي ضمانت رد ڪرڻ جي درخواست خارج ڪرڻ جو تفصيلي فيصلو جاري ڪري ڇڏيو، عدالت فارين ايڪسچينج ايڪٽ تحت داخل ڪيس جي شاهدين تي به سوال اٿاريا ويا آهن.
جسٽس طارق محمود جهانگيري تي ٻڌل بئنچ طرفان جاري ڪيل فيصلي ۾ چيو ويو ته هڪ به ثبوت نظر نه آيو ته عارف نقوي طرفان موڪليل رقم ڏوهه جي هئي، ايف آءِ آر ۾ لڳايل الزامن جو عمران خان يا طارق شفيع سان تعلق ئي ناهي، عمران خان ڪنهن به هڪ بئنڪ دستاويز تي صحيح ناهي ڪئي.
فيصلي ۾ چيو ويو ته بئنڪ اختيارين بابت اختيار اسٽيٽ بئنڪ جو آهي، جنهن ڪا به ڪارروائي ناهي ڪئي، مرڪزي بئنڪ نه جاچ ڪئي نه ئي تحريڪ انصاف کي مليل رقم کي غير قانوني چيو.
لکت ۾ جاري ڪيل فيصلي ۾ چيو ويو ته هڪ الزام پي ٽي آءِ اڪائونٽ کي نيا پاڪستان اڪائونٽ ۾ تبديل ڪرڻ جو آهي، جيڪو ڪو ڏوهه ناهي، ڪيس جي جاچ آفيسر اسٽيٽ بئنڪ اختيارين کي ڪو به بيان قلمبند نه ڪرايو.
فيصلي موجب ايف آءِ اي مطمئن نه ڪري سگهي ته عمران خان جي ضمانت ڇو رد ڪئي وڃي، بئنڪنگ ڪورٽ درست چيو ته ڪيس ۾ سمورا ثبوت دستاويزي آهن ۽ گرفتاري ضروري ناهي.
جاري ڪيل فيصلي ۾ چيو ويو ته ايف آءِ اي طرفان عمران خان جي ضمانت رد ڪرڻ واري درخواست خارج ڪئي وڃي ٿي.
