افغانستان هڪ دفعو ٻيهر داعش جي سرگرمين جو مرڪز بڻجڻ جو انڪشاف ٿيو آهي. پينٽاگون جو چوڻ آهي ته افغانستان هڪ دفعو ٻيهر داعش جي سرگرمين جو مرڪز بڻجي ويو آهي، داعش افغانستان ۾ رهي ڪري يورپ ۽ ايشيا لاءِ نيٽ ورڪ بڻائي رهي آهي………………
آمريڪي اخبار واشنگٽن پوسٽ جي رپورٽ موجب پينٽاگون جي ڳجهن دستاويزن ۾ انڪشاف ڪيو ويو آهي ته آمريڪي فوج نڪرڻ کانپوءِ داعش هڪ دفعو ٻيهر افغانستان ۾ سرگرم ٿي وئي آهي.
ڳجهن دستاويزن ۾ چيو ويو آهي ته داعش جا افغانستان ۾ موجود دهشتگرد هڪ ٻئي سان رابطا ڪري يورپ ۽ ايشيا ۾ دهشتگرد حملن جي منصوبا بندي ڪري رهيا آهن ۽ آمريڪا خلاف به سازش پيا ڪن.
ڳجهن دستاويزن ۾ چيو ويو آهي ته داعش سفارتخانن، چرچ، ڪاروباري مرڪزن ۽ فيفا ورلڊ ڪپ کي نشانو بڻائڻ جي به منصوبابندي ڪئي.
رپورٽ ۾ چيو ويو آهي ته داعش جا دهشتگرد افغانستان ۾ رهي ٻين ملڪن ۾ دهشتگرد ڪاررواين لاءِ نيٽ ورڪ ٺاهي رهيا آهن.
رپورٽ ۾ چيو ويو آهي ته دستاويزن ۾ القاعده جي ٻيهر فعال ٿيڻ جو ڪو به ذڪر ناهي، بائيڊن انتظاميه ليڪ ٿيندڙ دستاويزن جي تصديق کان انڪار ڪيو آهي.
