اليڪشن ڪميشن سمورين اسيمبلين جون چونڊون هڪ ئي وقت ڪرائڻ تي زور ڀريندي چيو آهي ته فنڊ نه ملڻ سبب 14 مئي تي پنجاب ۾ اليڪشن ناممڪن آهي، عام چونڊون هڪ ئي وقت نه ٿيو ته ملڪ ۾ انارڪي پکڙجندي،8 آڪٽوبر کان اڳ چونڊون ٿيون ته ملڪ ۾ انارڪي ۽ افرا تفري پکڙجڻ جو خدشو آهي، اليڪشن ڪميشن اها ذميواري کڻڻ لاءِ تيار ناهي.
اليڪشن ڪميشن طرفان سپريم ڪورٽ ۾ جمع ڪرايل رپورٽ جا تفصيل سامهون اچي ويا آهن.
جمع ڪرايل رپورٽ ۾ چيو ويو ته فنڊ نه ملڻ سبب 14 مئي تي پنجاب ۾ اليڪشن ناممڪن آهي
رپورٽ ۾ اليڪشن ڪميشن چيو ته چونڊن بابت سمورن معاملن تي غور ۽ زميني حقيقتن کي نظر ۾ رکندي 8 آڪٽوبر جي تاريخ ڏني هئي.
جمع ڪرايل رپورٽ ۾ چيو ويو ته اليڪشن ڪميشن جي نظر ۾ هڪ ئي وقت چونڊون ڪرائڻ جو رستو اختيار نه ڪيو ويو ته ملڪ ۾ انارڪي پکڙجندي.
رپورٽ موجب پنجاب۾ چونڊن لاءِ دستياب پوليس اهلڪارن جو انگ 81 هزار 50 ۽ ضرورت 4 لک 66 هزار اهلڪارن جي آهي.
اليڪشن ڪميشن رپورٽ ۾ چيو ته پوليس ۽ ٻيا سڪيورٽي ادارا آپريشنن ۾ مصروف آهن.
رپورٽ ۾ چيو ويو ته هڪ ڏينهن تي اليڪشن نه ٿيڻ سان خرچ وڌيڪ ٿيندو، اليڪشن لاءِ خرچ ۾ سڪيورتي نظام جي چرپر شامل آهي.
اليڪشن ڪميشن رپورٽ ۾ ڍچيو ته مختلف مرحلن ۾ چونڊون ڪرائڻ سان تشدد جا امڪان وڌي ويندا آهن، هڪ تڪ تي هارائيندڙ پارٽي ٻئي مرحلي ۾ تشدد جو رستو اختيار ڪري سگهجي.
رپورٽ موجب ٻئي مرحلي ۾ نتيجن تي اثرانداز ٿيڻ جا امڪان وڌي ويندا آهن.
اليڪشن ڪميشن موجب مختلف مرحلن ۾ چونڊون ڪرائڻ سان شرپسندن طرفان حملن جا امڪان وڌي ويندا آهن.
رپورٽ ۾ چيو ويو ته 1970ع ۽ 1977ع ۾ چونڊون مرحليوار ڪرايون ويون.
اليڪشن ڪميشن جي رپورٽ موجب 1970ع وارين چونڊن ۾ قومي اسيمبلي جي نتيجن جا اعلان اڳ ٿيڻ سان کٽيل پارٽين ۾ جشن جو ماحول هو.
رپورٽ ۾ چيو ويو ته 1977ع جي چونڊن ۾ هارائيندڙ پارٽين چونڊن جو بائيڪاٽ ڪندي ڌانڌليءَ جو الزام مڙهيو.
اليڪشن ڪميشن رپورٽ ۾ چيو ته 8 آڪٽوبر کان اڳ چونڊون ٿيون ته ملڪ ۾ انارڪي ۽ افرا تفري پکڙجڻ جو خدشو آهي، اليڪشن ڪميشن اها ذميواري کڻڻ لاءِ تيار ناهي.
