اليڪشن ڪميشن سپريم ڪورٽ جي حڪم تي چوڏهن مئي تي پنجاب ۾ چونڊون ڪرائڻ جو فيصلو ڪندي شيڊيول جاري ڪري ڇڏيو آهي.
پنجاب ۾ عام چونڊن بابت سپريم ڪورٽ جي فيصلي تي اليڪشن ڪميشن جو صلاح مشوري وارو اجلاس ٿيو.
اجلاس دوران فيصلو ڪيو ويو ته اليڪشن ڪميشن چونڊون ڪرائڻ لاءِ تيار آهي، سپريم ڪورٽ جي فيصلي تي جيئن جو تيئن عمل ڪيو ويندو.
جاري ڪيل پڌرنامي موجب پنجاب ۾ چونڊون 14 مئي تي ٿينديون، نامزدگي ڪاغذ جمع ڪرائڻ جي آخري تاريخ 10 اپريل هوندي.
پڌرنامي موجب ٽربيونل اپيلن تي فيصلا 17 اپريل تائين ڪندا ۽ اميدوارن جي نظرثاني ٿيل قطعي لسٽ 18 اپريل تي جاري ٿيندي.
اليڪشن ڪميشن موجب نامزدگي ڪاغذ واپس وٺڻ جي تاريخ 19 اپريل هوندي ۽ چونڊ نشان 20 اپريل تي جاري ڪيا ويندا.
اليڪشن ڪميشن جي اجلاس ۾ پنجاب جي نگران حڪومت سان رابطي جو به فيصلو ڪيو ويو آهي.
نگران حڪومت سان انتظامي ۽ سڪيورٽي معاملن تي صلاح مشورا ڪيا ويندا.
اليڪشن ڪميشن چونڊن ڪرائڻ خاطر فنڊن لاءِ ناڻي واري وزارت سان به رابطو ڪيو آهي.
