سنڌ جي توانائي واري وزير امتياز شيخ، گيس ميٽر چارجنگ ۾ حد کان وڌيڪ اضافي تي ڳڻتي جو اظهار ڪندي مملڪتي وزير مصدق ملڪ کي خط لکي ڇڏيو، سندس چوڻ آهي ته اوگرا جي ڇت هيٺيان سوئي سندرن گيس ڪمپني عوام کان ميٽر جو ڪرايو حد کان وڌيڪ اوڳاڙي رهي آهي.
خط ۾ صوبائي وزير امتياز شيخ چيو ته سنڌ ۾ گهريلو صارفين لاءِ گيس جي بل جي ادائگي انتهائي ڏکي ٿي چڪي آهي، گيس جي بلن ۾ اضافي جو ڪوبه قدم عام ماڻهو جي پريشانين ۾ وڌيڪ واڌ ڪري ڇڏيندو.
سندس چوڻ هو ته ايس ايس جي سي ايل جي ڪارروائي معاشري جي وڏي طبقي جي ڏکيائين ۾ اضافو ڪندي، سنڌ حڪومت، وفاقي حڪومت کي ريگوليٽري ادارن ۾ نمائندگي لاءِ ڪيترائي ڀيرا چئي چڪي آهي.
صوبائي وزير امتياز شيخ چيو ته وفاقي ريگوليٽري ادارن ۾ سنڌ جي نمائندگي جو فقدان آحي، صوبي جي گيس جي ورهاست لاڳاپيل ڪمپني کي ڪرڻي هوندي آهي، افسوس آهي ته وفاقي حڪومت اڃا تائين ڪنهن به خط جو جوان ناهي ڏنو.
هن چيو ته سنڌ ملڪ ۾ قدرتي گيس پيدا ڪندڙ سڀ کان وڏو صوبو آحي، جنهن جو حصو ملڪ جي سموري پيداوار جو 63 سيڪڙو آهي.
سندس چوڻ هو ته سنڌ کي گيس پيداوار جي بنياد تي آئين جو آرٽيڪل 158 ٻين صوبن جي ڀيٽ ۾ سنڌ کي وڌيڪ ملڪيتي حق فراهم ڪري ٿو.
سنڌ جي توانائي واري وزير امتياز شيخ چيو ته آرٽيڪل 158 تي عمل نه ٿيڻ صوبي ۾ احساس محرومي جو سبب بڻجي رهيو آهي، وفاقي حڪومت کي اپيل آهي ته ميٽر رينٽ چارجز جي اضافي تي نظرثاني ڪئي وڃي.
