امريڪي رياست فلوريڊا جي سامونڊي شھر فورٽ لاڊرڊيل ۾ برسات تباھي مچائي ڇڏي، اسڪول بند ۽ اڏامون معطل ڪيون ويون آھن.
پرڏيھي ميڊيا رپورٽس موجب، امريڪي رياست فلوريڊا جي ڏکڻ اوڀر جي علائقن ۾ ڪيترن ئي ڏينھن کان تيز برساتن سبب ٻوڏ واري صورتحال پيدا ٿي وئي آھي.
مسلسل برساتن سبب گاڏيون ٻڏي ويون آھن، ٽريفڪ جام آھي، جڏھن تھ شھر جو انٽرنيشنل ايئرپورٽ ۽ اسڪول جمعي تائين بند ڪيا ويا آھن، پاڻي ۾ ڦاٿل ماڻھن کي ٻيڙين ذريعي ڪڍيو پيو وڃي، جڏھن تھ شھر ۾ ھنگامي حالت لاڳو ڪئي وئي آھي.
سامونڊي شھر فورٽ لاڊرڊيل جا روڊ تلائن جو ڏيک ڏئي رھيا آھن، فورٽ لاڊرڊيل ھالي وڊ انٽرنيشنل ايئرپورٽ تي 4سئو اڏامون معطل ڪيون ويون آھن، رن وي تي ايندڙ پاڻي کي خشڪ ڪرڻ لاءِ ايئرپورٽ کي بند ڪيو ويو آھي.
نيشنل ويدر سروس موجب فورٽ لاڊرڊيل ۾ 24ڪلاڪن دوران 635 ملي ميٽر برسات پئي جيڪا ھاڻي تائين ھزار سالن جي برساتن مان ھڪ آھي.
ٻئي طرف فلوريڊا جي شھر ميامي ۾ بھ گذريل ڪيترن ئي ڏينھن کان برسات جاري آھي.
