آءِ جي سنڌ غلام نبي ميمڻ چيو آهي ته انسانيت جي بقا لاءِ منشيات، گٽڪي، مائي جهڙي لعنت کي پاڙان ختم ڪرڻو پوندو، منشيات خلاف ايڪشن وڌيڪ تيز ڪيو وڃي.
آءِ جي سنڌ غلام نبي مميڻ جي صدارت هيٺ ٽاسڪ فورس جو اعليٰ سطحي اجلاس ٿيو، جنهن ۾ شامل سمورن آفيسرن شرڪت ڪئي.
ان موقعي تي ڳالهائيندي آءِ جي سنڌ چيو ته بهتر ڪم ڪرڻ تي هو ٽاسڪ فورس جي شاباس ڏي ٿو، منشيات، گٽي ۽ مائي خلاف ايڪشن وڌيڪ تيز ڪيو وڃي.
هن چيو ته جتي جتي منشيات جو وڪرو ۽ واهپو هلي پيو، اتي مقرر آفيسر خلاف کاتي واري ڪارروائي ڪئي وڃي.
ايڊيشنل آءِ جي انويسٽيگيشن چيو ته ٽاسڪ فورس انتهائي ديانتداريءَ سان ڪم ڪري رهي آهي، سموريون لسٽون فورس کي ڏنيون ويون آهن.
هن چيو ته ڄاڻ جي بنياد تي روزانو ڪارروايون ڪيون پيون وڃن.
ايس ايس پي آر آر ايف جي فوڪ پرسن بريفنگ ۾ ٻڌايو ته ڪراچي رينج ۾ 151 ڇاپن ۽ 151 ايف آءِ آرز تحت 217 گرفتاريون ڪيون ويون.
هن چيو ته حيدرآباد رينج ۾ 50 ڇاپن ۽ ايف آءِ آرز تحت 70 گرفتاريون ۽ سکر رينج ۾ 31 ڇاپن ۽ ايف آءِ آرز تحت 36 گرفتاريون ڪيون ويون.
بريفنگ ۾ ٻڌايو ويو ته مجموعي طور 232 ڇاپن ۽ 232 ايف آءِ آرز تحت 323 گرفتاريون ڪيون ويون آهن.
اجلاس کي ٻڌايو ويو ته پوليس آفيسرن خلاف ايڪشن ۾ڪراچي جي پنجن ايس ايڇ اوز خلاف ڪارروايون ڪيون ويون، حيدرآباد ۾ پندرهن ايس ايڇ اوز ۽ ٽن ڊي ايس پيز، جڏهن ته سکر ۾ هڪ ايس ايڇ او ۽ ٻن ڊي ايس پيز خلاف ايڪشن ورتو ويو.
