ايس ٽي پي سربراهه ڊاڪٽر قادر مگسي پروفيسر ڊاڪٽر اجمل ساوند جي قاتلن جي گرفتاري لاءِ ڪراچي ۾ 14 مئي تي ڌرڻي جو اعلان ڪندي چيو آهي ته اجمل ساوند جو قتل ٽارگيٽ ڪلنگ آهي، بدامني سبب ماڻهو پنهنجا گهر ڇڏي وڃي رهيا آهن، سردار پنهنجي ماڻهن کي سپورٽ ڪن ٿا جنهن ڪري اهي علائقا نوگو ايريا ٿي ويا آهن.
سکر ۾ اجمل ساوند جي وارثن سان تعزيت بعد پريس ڪانفرنس ڪندي ڊاڪٽر قادر مگسي چيو ته ڪنڌڪوٽ ڪشمور وارن علائقن ۾ ڊي آءِ جي ۽ ايس ايس پي به نٿا وڃي سگهن، بدامني سبب ماڻهو پنهنجا گهر ڇڏي وڃي رهيا آهن.
هن چيو ته سردار پنهنجي ماڻهن کي سپورٽ ڪن ٿا جنهن ڪري هي علائقا نوگو ايريا ٿي ويا آهن، ڊاڪٽر اجمل ساوند سنڌ جي ماڻهن کي تعليم ڏيڻ لاءِ يورو جون روشنيون ڇڏي پنهنجن کي علم ڏيڻ لاءِ پهتو هو.
سندس چوڻ هو ته پروفيسر ڊاڪٽرن اجمل ساوند جي وارثن جن جو نالو ڏنو آهي اهي گرفتار ڪيا وڃن، وڏو وزير چاهي ته هڪ ڏينهن ۾ قاتل گرفتار ٿي سگهن ٿا.
ڊاڪٽر قادر مگسي چيو ته جيڪڏهن ماڻهو گرفتار نه ٿيا ته هو سمجهندا ته وڏو وزير قاتل آهي، 14 مئي تي پروفيسر اجمل ساوند جي قاتلن جي گرفتاري لاءِ ڪراچي پريس ڪلب اڳيان ڌرڻو هنيو ويندو.
هن چيو ته آدمشماري جي نالي تي دوکو ڪيو ويو هڪ مهيني واري ۾ ٽي مهينا لڳي ويا، ڪنهن به سياسي پارٽي جي فرمائش تي آدمشماري نه ڪئي وڃي، آدمشماري ۾ اهو به ٻڌايو وڃي ته ڪيترا پرڏيهي شامل ڪيا ويا آهن.
ايس ٽي پي سربراهه چيو ته سڀ ڪوششون ڪري ويا آهن ته سنڌ ورهائن پر ڪوبه ڪاميابي حاصل نه ڪري سگهيو آهي.
هن چيو ته پڙهيل ليکل ماڻهو الڪشن وڙهي سردارن ۽ ڀوتارن کي شڪست ڏين ته سڀ بهتر ٿي ويندو.
