آمريڪي ايئرفورس جي هڪ فور اسٽار جنرل خبردار ڪيو آهي ته آمريڪا ۽ چين جي وچ ۾ تائيوان معاملي تي 2025 ۾ جنگ ٿي سگهي ٿي.
اي ايف پي جي مطابق سوشل ميڊيا تي منظرعام تي اچڻ واري ميمورنڊم ۾ ايئر موبلٽي ڪمانڊ جي جنرل مائيڪ مني هن چيو ته اسان جو بنيادي مقصد ان کي روڪڻ ۽ جييڪڏهن ضرورت پئي ته چين کي شڪست ڏيڻ هوندو.
هن پنهنجي ڪمانڊرز کي هن سال پنهنجون تمام تياريون مڪمل رکڻ جي هدايت ڪندي چيو ته مان چاهيان ٿو ته مان غلط ثابت ٿيان پر خدشو آهي ته اسان جي وچ ۾ 2025 تائين جنگ ٿيندي.
آمريڪي جنرل ان پيش گوئي جو سبب ٻڌائيندي چيو ته ايندڙ سال تائيوان ۾ صدارتي چونڊون آهن جيڪي چين کي فوجي جارحيت جو جواز فراهم ڪري سگهن ٿيون جڏهن ته آمريڪا پاڻ به وائٽ هائوس ۾ نئين صدر جي چونڊ مقابلي لاءِ مصروف هوندو.
آمريڪي جنرل جي طرفان لکيل ان ميمورنڊم جي پينٽاگون جي طرفان تصديق ڪئي وئي آهي.
هن ميمورنڊم ۾ موبائل ڪمانڊ جي ٽيم جي تمام اهلڪارن کي فائرنگ رينج جي پريڪٽس ۽ نشانو لڳائڻ جي تربيت جي هدايت به ڪئي وئي آهي.
پينٽاگون جي ترجمان اي ايف پي سان ان ميمو جي تصديق ڪندي ٻڌايو ته اها حقيقت آهي ۽ ميمو موڪليو ويو آهي.
ياد رهي ته آمريڪا 1979 ۾ پنهنجا سفارتي تعلقات تائپي کان بيجنگ جي طرف منتقل ڪري ڇڏيو هو پر ان باوجود تائيوان جو اتحادي آهي ۽ تائپي سان ڊي فيڪٽو سفارتي تعلقات کي برقرار رکيو آهي.
