اڳوڻي صدر آصف علي زردري ۽ پ پ چيئرمين بلاول ڀٽو زرداري، شهيد ذوالفقار علي ڀٽي جي شهادت جي ڏهاڙي تي کيس شاندار لفظن ۾ ڀيٽا پيش ڪئي آهي.
جاري ڪيل پيغام ۾ پ پ جي شريڪ چيئرمين آصف علي زرداري چيو آهي ته تاريخ ذوالفقار ڀٽو شهيد جي ڦاهي کي عدالتي قتل قرار ڏئي چڪي آهي.
آصف علي زرداري چيو ته سپريم ڪورٽ ۾ صدارتي ريفرنس 10 سالن کان ٻڌڻي جو انتظار ڪري رهيو آهي، 10 سال گذرڻ باوجود عدالت شهيد ڀٽو جي ريفرنس تي راءِ ناهي ڏئي سگهي آهي ته ريفرنس ٻڌڻ جوڳو آهي يا نه.
هن چيو ته پاڪستان ۽ 1973ع جو آئين ذوالفقار علي ڀٽي جي امانت آهي، هن پاڪستان ۽ آئين جي سلامتي لاءِ ڪنهن به قرباني کان ڪڏهن به نه ڪيٻايو.
پ پ جي شريڪ چيئرمين چيو ته قائد عوام ذوالفقار علي ڀٽو جو عدالتي قتل ڪيو ويو، پر هو اڄ به عوام جي دلين ۾ زنده آهي.
پ پ چيئرمين ۽ پرڏيهي وزير بلاول ڀٽو زرداري چيو آهي ته ملڪ جي پهرين چونڊيل وزيراعظم ذوالفقار علي ڀٽو جوعدالتي قتل عدل ۽ انصاف جي نظام تي ڪارو داخ آهي.
هن چيو ته اڳوڻي وزيراعظم شهيد ذوالفقار علي ڀٽي جي عدالتي قتل جي حوالي سان صدارتي ريفرنس گذريل 12 سالن کان سپريم ڪورٽ ۾ پيل آهي، ٻڌايو وڃي ته انصاف حاصل ڪرڻ لاءِ ڀٽو خاندان جي ڪيترن نسلن کي اڃا انتظار ڪرڻو پوندو.
پ پ چيئرمين چيو ته تاريخ ايترا ثبوت پيش ڪري ڇڏيا آهن، جو بدترين دشمنن کي به هاڻي اهو چوڻو پئجي ويو آهي ته قائد عوام سان ظلم ٿيو.
