تحريڪ انصاف حڪومت خلاف لانگ مارچ جو اشارو ڏئي ڇڏيو، فواد چوڌري جو چوڻ آهي ته ڳالهيون ناڪام ٿيڻ جي صورت ۾ حڪمت عملي تيار ڪئي وئي آهي، ڳالهيون ناڪام ٿيڻ جي صورت ۾ عوام وڏي تحريڪ لاءِ تيار ٿي وڃي، تحريڪ جي شروعات سڀاڻي لاهور، اسلام آباد ۽ پشاور ۾ ريلي سان ٿي رهي آهي.
سماجي رابطن واري ويب سائيٽ ٽوئيٽر تي جاري ڪيل ٽوئٽ ۾ فواد چوڌري چيو ته تحريڪ انصاف حڪومت سان ڳالهين جي ڪاميابي چاهي ٿي پر ناڪامي جي صورت ۾ حڪمت عملي تيار ڪئي وئي آهي.
سندس چوڻ هو ته اهو نٿو ٿي سگهي ته آئين کي ردي جو ٽڪرو ۽ عوام کي ڪيڙو ماڙوڪو سمجهيو وڃي ته تحريڪ انصاف خاموش ويهي رهي.
تحريڪ انصاف جي اڳواڻ فواد چوڌري چيو ته ڳالهيون ناڪام ٿيڻ جي صورت ۾ عوام وڏي تحريڪ لاءِ تيار ٿي وڃي، تحريڪ جي شروعات سڀاڻي لاهور، اسلام آباد ۽ پشاور ۾ ريلي سان ٿي رهي آهي ۽ عروج لانگ مارچ هوندو.
پنجاب جي نگران وڏي وزير جي بيان تي رد عمل ظاهر ڪندي پي ٽي آءِ اڳواڻ فواد چوڌري چيو ته جيڪو وڏو وزير پاڻ غير آئيني ۽ غير قانوني آهي ڪيئن چئي سگهي ٿو ته ڪنهن کي غيرقانوني ڪم ڪرڻ نه ڏنو ويندو؟.
سندس چوڻ هو ته سپريم ڪورٽ سندن ڪيس جو فيصلو ڪري، 90 ڏينهن بعد نگران حڪومتون ڪيئن برقرار رکي سگهن ٿيون؟.
پي ٽي آءِ اڳواڻ فواد چوڌري، آمريڪي ڪانگريس ميمبر بريڊ شرمين جي پاڪستاني عوام جي حق ۾ تقرير جي آجيان ڪندي چيو ته بريڊ شرمين پاڪستاني ماڻهن جي حقن لاءِ ڳالهه ڪئي آهي، حقن ۽ جمهوريت سان وابستگي جديد انسانيت جو نچوڙ آهي.
