لاهور پوليس زمان پارڪ ۾ آپريشن ڪيو آهي ۽ گيٽ ٽوڙي عمران خان جي گهر اندر داخل ٿي وئي آهي.
پوليس سان گڏ موجود اينٽي انڪروچمينٽ جي ٽيم ڪرين جي ذريعي عمران خان جي گهر جو دروازو ۽ ڀت ٽوڙي ڇڏي جڏهن ته رهائش گاهه ٻاهر موجود مورچن ۽ تجاوزات کي هٽايو ويو آهي.
پوليس پاران آپريشن جي دوران پاڪستان تحريڪ انصاف جي 40 کان وڌيڪ ڪارڪنن کي پڻ گرفتار ڪري ورتو آهي.
جڏهن ته عمران خان جي گهر اندران پوليس اهلڪارن تي فائرنگ پڻ ڪئي وئي آهي جڏهن ته پيٽرول بم ۽ پٿر به اڇلايا ويا جنهن جي نتيجي ۾ پوليس جا ٽي اهلڪار زخمي ٿي پيا.
هوڏانهن پوليس پاران اسپيڪر ذريعي قلم 144 جو اعلان ڪيو ويو آهي ۽ ڪارڪنن کي هٽي وڃڻ جي اپيل ڪئي وئي آهي.
ٻئي طرف پي ٽي آءِ ڪارڪنن ۽ پوليس اهلڪارن ۾ چڪريون پڻ هلندڙ آهن.
ڪارڪنن طرفان پٿراءُ سبب ڪيترائي پوليس اهلڪار زخمي ٿي پيا آهن.
پوليس ڪيترائي پي ٽي آءِ جا ڪارڪن گرفتار ڪري ورتا آهن، جڏهن ته ڇڪتاڻ برقرار آهي.
توشا خانه ڪيس: عمران خان گاڏي ۾ ئي حاضري لڳائي واپس روانو
پاڪستان تحريڪ انصاف جو چيئرمين عمران خان توشا خانه ڪيس ۾ گاڏي ۾ ئي عدالت ۾ پيشي لاءِ حاضري لڳائي جوڊيشل ڪمپليڪس مان واپس روانو ٿي ويو.
عمران خان جي گاڏي جوڊيشل ڪمپليڪس پهچڻ تي پي ٽي آءِ جا ڪارڪن به وڏي تعداد ۾ پهچي ويا ۽ عدالتي احاطي ۾ وڃڻ جي پڻ ڪوشش ڪئي.
جڏهن ته شبلي فراز ۽ فرخ حبيب به پوليس جي لٺبازي جي زد ۾ اچي ويا ۽ بعد ۾ شبلي فراز کي گرفتار ڪيو ويو ۽ ڪجهه ئي دير بعد عدالت جي چوڻ تي کيس آزاد ڪيو ويو.
عمران خان جي وڪيل بابر اعواڻ جي طرفان حاضري کان ڇوٽ واري درخواست داخل ڪندي چيو ته ٻڌايو اهڙي صورتحال ۾ ڇا ڪيو وڃي عمران خان کي گاڏي ۾ ئي عدالتي حاضري لڳائڻ جي اجازت ڏني وڃي، جنهن تي سيشن جج ظفر اقبال عمران خان جي گاڏي ۾ حاضري لڳائڻ جي استدعا منظور ڪندي چيو ته عمران خان کان گاڏي ۾ ئي عدالتي حاضري جا دستخط ورتا وڃن.
جڏهن ته ان کان اڳ اسلام آباد موٽروي تي ٽول پلازا جو ڪنٽرول پوليس پاران سنڀاليو ويو هو ۽ پوليس اسلام آباد ٽول پلازا تي ڪم ڪرڻ وارن ملازمن کي به هٽائي ڇڏيو هو.
