توشا خانه ڪيس ۾ پي ٽي آءِ چيئرمين عمران خان جا گرفتاري وارنٽ رد ڪندي فرد جرم واري ڪارروائي به ملتوي ڪئي وئي آهي، عمران خان عدالت جي گيٽ تي بليٽ پروف گاڏيءَ ۾ ويهي حاضري لڳائي، پي ٽي آءِ چيئرمين جي صحيح وارو فائل غائب ٿي ويو، پيشي دوران پوليس ۽ پي ٽي آءِ ڪارڪنن وچ چڪرين سبب جڊيشل ڪمپليڪس جنگ جو ميدان بڻجي ويو، عدالت ڪيس جي ٻڌڻي 30 مارچ تائين ملتوي ڪندي عمران خان کي ذاتي حيثيت ۾ طلب ڪري ورتو.
پي ٽي آءِ چيئرمين عمران خان جي گاڏي جڊيشل ڪمپليڪس پهچڻ تي ڪارڪنن جو وڏو انگ به اتي پهچي ويو ۽ ڪارڪنن عدالتي اڱڻ ۾ وڃڻ جي ڪوشش ڪئي، جنهن دوران پوليس مٿن لٺبازي ڪئي.
شبلي فراز ۽ فرخ حبيب به پوليس جي لٺبازي جي وڪڙ ۾ اچي ويو، جنهن بعد شبلي فراز کي عدالتي اڱڻ مان گرفتار ۽ بعد آزاد ڪيو ويو.
عمران خان جي وڪيل بابر اعواڻ حاضري کان ڇوٽ واري درخواست داخل ڪندي چيو ته ٻڌايو وڃي ته اهڙي صورتحال ۾ ڇا ڪيو وڃي؟ عمران خان گاڏيءَ ۾ حاضري لڳائڻ جي اجازت ڏني وڃي.
سيشن جج ظفر اقبال عمران خان جي گاڏيءَ ۾ حاضري لڳائڻ جي درخواست منظور ڪندي چيو ته عمران خان کان گاڏيءَ ۾ عدالتي حاضري جي صحيح ورتي ورتي وڃي.
ڪارڪنن طرفان جڊيشل ڪمپليڪس کان ٻاهر نه وڃڻ تي عمران خان گاڏيءَ ۾ ئي عدالتي حاضري لڳائي واپس هليو ويو.
پي ٽي آءِ جي مڇريل ڪارڪنن عدالت ٻاهران لڳل بيريئر ٽوڙي ڇڏيا ۽هڪ گاڏيءَ کي باهه ڏئي ڇڏي.
عمران خان جي روانگيءَ بعد تحريڪ انصاف جي ڪارڪنن ۽ پوليس وچ ۾ چڪريون ٿيون ۽ علائقو جنگ جو ميدان بڻجي ويو، احتجاج ڪندڙن پوليس تي پئٽرول بم اڇلايا ۽ پوليس جي گاڏي توڙي چوڪي کي باهه ڏئي ڇڏي.
عمران خان جي صحيح حاضري وارو فائل غائب ٿي ويو، عدالت طرفان ايس پي کان فائل طلب ڪرڻ تي هن چيو ته وٽس عمران خان جي صحيح وارو فائل موجود ناهي.
عدالت پڇاڻو ڪيو ته ڇا عمران خان فائل تي صحيح ڪئي هئي؟ جنهن تي ايس پي چيو ته کيس ٻاهر روڪيو ويو هو.
سيشن ڪورٽ توشا خانا ڪيس ۾ عمران خان جا گرفتاري وارنٽ معطل ڪندي فرد جرم جي ڪارروائي به ملتوي ڪري ڇڏي.
عدالت طرفان توشا خانا ڪيس جي ٻڌڻي 30 مارچ تائين ملتوي ڪئي وئي.
سيشن جج ظفر اقبال چيو ته توشا خان ڪيس ۾ عمران خان جا گرفتاري وارنٽ معطل ڪريون ٿا، 30 مارچ تي ڪيس ٻڌڻ جوڳو هجڻ تي دليل ڏنا ويندا.
ايڊيشل سيشن جج چيو ته 30 مارچ تي عمران خان کي ذاتي حيثيت ۾ پيش ٿيڻو پوندو، اها ڌار ڳالهه آهي ته ان وقت صورتحال ڪهڙي هوندي؟.
