تحريڪ انصاف جو چيئرمين عمران خان توشه خانه ڪيس ۾ عدالت ۾ پيش ٿيڻ لاءِ زمان پارڪ لاهور کان اسلام آباد روانو ٿي ويو.
پي ٽي آءِ چيئرمين عمران خان قافلي جي صورت ۾ موٽر وي ذريعي اسلام آباد پهچندو.
پي ٽِي آءِ چيئرمين جي درخواست تي پيشي جو هنڌ تبديل ڪيو ويو، عدالتي ڪارروائي هاڻي جوڊيشل ڪمپليڪس جـِي اليون ۾ ٿيندي.
ايڊيشنل سيشن جج ظفر اقبال عمران خان تي فرد جرم لاڳو ڪرڻ لاءِ طلب ڪيو آهي.
عدالت اڄ تائين گرفتاري وارنٽ معطل ڪندي پوليس کي عمران خان جي گرفتاري کي روڪيو آهي.
عمران خان جي پيشي جي موقعي تي جوڊيشل ڪمپليڪس ۽ ڀرپاسي ۾ سڪيورٽي هاءِ الرٽ رهندي صرف لاڳاپيل ۽ محدود ماڻهن کي جوڊيشل ڪمپليڪس ۾ داخل ٿيڻ جي اجازت هوندي، پي ٽي آءِ ڪارڪنن جي داخلا تي مڪمل پابندي لڳائي ويئي آهي.
ان کان علاوه پنجاب حڪومت راولپنڊي ضلعي ۾ قلم 144 لاڳو ڪري ڇڏيو آهي.
پنجاب حڪومت طرفان جاري ڪيل نوٽيفڪيشن موجب، قلم 144 هڪ ڏينهن لاءِ لڳايو ويو آهي، ريلين، جلسن ۽ ٻين اجتماعن جي اجازت نه هوندي.
نوٽيفڪيشن ۾ چيو ويو آهي ته فيصلو امن امان جي صورتحال کي نظر ۾ رکندي ڪيو ويو آهي.
هوڏانهن اسلام آباد پوليس جي ترجمان جو چوڻ آهي ته وفاقي راڄڌاني ۾ اڳ ئي قلم 144 لاڳو ٿيل آهي، پرائيوٽ ڪمپنين، سڪيورٽي گارڊز ۽ ڪنهن به شخص جي هٿيار کڻي هلڻ تي پابندي آهي.
