اڳوڻي چيف جسٽس ثاقب نثار جي پٽ جي مبينا آڊيو ليڪس جي گهرو وزارت کان فارنزڪ آڊٽ ڪرائڻ جو فيصلو ڪيو ويو آهي، اسلم ڀوتاڻي جو چوڻ آهي ته پارليامينٽ آڊيو ليڪس جي جاچ جي ذميواري ڏني آهي، فارنزڪ رپورٽ اچڻ کانپوءِ ٻئي پارٽي کي طلب ڪرڻ جو فيصلو ڪيو ويندو.
اڳوڻي چيف جسٽس ثاقب نثار جي پٽ نجم ثاقب جي مبينا آڊيو ليڪ تي قومي اسيمبلي جي اسپيڪر پاران جوڙيل خصوصي ڪميٽي جو اجلاس ميمبر اسلم ڀوتاڻي جي صدارت هيٺ ٿيو.
اجلاس ۾ فيصلو ڪيو ويو ته اڳوڻي چيف جسٽس جي پٽ جي آڊيو ليڪ جي جاچ ايف آءِ اي کان ڪرائڻ لاءِ گهرو وزارت کي خط لکيو ويندو.
ڪميٽي گهرو وزارت کي ايف آءِ اي کان معاملي جي جاچ ڪرڻ لاءِ هدايتون ڏيندي.
قومي اسيمبلي جي خاص ڪميٽي ايف آءِ اي کان 10 ڏينهن اندر رپورٽ طلب ڪئي.
خاص ڪميٽي اڳوڻي چيف جسٽس جي پٽ نجم ثاقب کي ڪميٽي ۾ طلب ڪرڻ جو فيصلو به ڪيو.
اجلاس کانپوءِ ميڊيا سان ڳالهائيندي اسلم ڀوتاڻي چيو ته ڪميٽي ايوان جي ڪارروائي سپريم ڪورٽ حوالي ڪرڻ بابت فيصلا ڪري ايوان کي آگاهه ڪندي ۽ اڳوڻي چيف جسٽس ثاقب نثار جي پٽ نجم نثار جي آڊيو ليڪ واري معاملي جي جاچ ڪندي.
اسلم ڀوتاڻي جو چوڻ آهي ته پارليامينٽ آڊيو ليڪس جي جاچ جي ذميواري ڏني آهي، فارنزڪ رپورٽ اچڻ کانپوءِ ٻئي پارٽي کي طلب ڪرڻ جو فيصلو ڪيو ويندو.
هن چيو ته ، ثاقب نثار، سندس پٽ ۽ ٽڪيٽ هولڊرن کي ٻڌڻ کانسواءِ هڪ طرفي ڪارروائي ممڪن ناهي، ڪميٽي سپريم ڪورٽ کي عدالتي سڌارن واري ڪيس ۾ رڪارڊ ڏيڻ يا نه ڏيڻ بابت به فيصلو ڪندي.
