سپريم ڪورٽ جي سينيئر ترين جج جسٽس قاضي فائز عيسيٰ پنهنجي فيصلي خلاف لارجر بئنچ جي ڪارروائيءَ تي اعتراض اٿاريندي چيو آهي ته تڪبر ۽ آمريت تي ٻڌل عدالتي فيصلا آئين کي برطرف نه ٿا ڪري سگهن، 6 رڪني بئنچ جي فيصلي جي ڪا به حيثيت آهي، چيف جسٽس لاءِ استعمال ڪيل لفظ ماسٽر آف روسٽرز آئين ۾ ڪٿي به نه ٿو ملي.
جسٽس قاضي فائز عيسيٰ حافظ قرآن اضافي مارڪو واري ڪيس ۾ تفصيلي نوٽ جاري ڪري ڇڏيو.
تفصيلي نوٽ ۾ چيو ويو ته وفاقي حڪومت رجسٽرار عشرت علي کي 3 اپريل کي عهدي تان هٽائي چڪي هئي.
هن چيو ته رجسٽرار حڪومت جو حڪم تسليم نه ڪندي 4 اپريل تي 6 رڪني بئنچ جو روسٽر جاري ڪيو، رجسٽرار 29 مارچ جي فيصلي تي غيرقانوني سرڪلر جاري ڪيو.
تفصيلي نوٽ ۾ چيو ويو ته تڪبر ۽ آمريت جهڙا عدالتي فيصلا آئين کي برطرف نه ٿا ڪري سگهن.
جسٽس قاضي فائز عيسيٰ چيو غير قانوني سرڪلر جو چيف جسٽس کي به خط لکيو، پر ڪو به جواب نه مليو، سرڪلر غيرآئيني هجڻ جو احساس ٿيڻ تي ئي 6رڪني لارجر بئنچ جوڙي وئي.
تفصيلي نوٽ ۾ چيو ويو ته سپريم ڪورٽ جي حڪم خلاف ڪا ٻي بئنچ اپيل نه ٿي ٻڌي سگهي، نام نهاد لارجر بئنچ جي جوڙجڪ غير آئيني ۽ غير قانوني هئي.
هن چيو ته 6 رڪني لارجر بئنچ جي فيصلي جي ڪا به آئيني حيثيت ناهي، تڪڙ ۾ لارجر بئنچ ٻڌڻي ڪري اٺن صفحن تي ٻڌل فيصلو به جاري ڪيو.
تفصيلي نوٽ ۾ چيو ويو ته معمول موجب ٻڌڻي ٿئي ها ته 4 جج سوچن ها ته سندن سينيئر ڇا ڪري رهيا آهن.
هن چيو ته عدليا جو ڪم آئين ۽ قانون موجب فيصلو ڪرڻو آهي، اختيار اورنگهيا وڃن ته ججن جي قسم جي ڀڃڪڙي ٿيندي.
تفصيلي نوٽ ۾ چيو ويو ته ڇهه رڪني بئنچ غير آئيني هو، ان لاءِ 29 مارچ جو فيصلو ڪالعدم قرار نه ٿو ڏئي سگهجي.
جسٽس قاضي فائز عيسيٰ چيو ته لارجر بئنچ جي حڪم مان آمراڻي جهلڪ نظر اچي ٿي، جيڪو آئين جو متبادل نه ٿو ٿي سگهي.
تفصيلي نوٽ ۾ چيو ويوته چيف جسٽس لاءِ استعمال ڪيل لفظ ماسٽر آف روسٽرز آئين ۾ ڪٿي به نه ٿو ملي.
جسٽس قاضي فائز عيسيٰ چيو ته 10 اپريل 1973ع تي آئين کي قومي اسيمبلي جي 200 مان 196 ميمبر اتفاقِ راءِ سان منظور ڪيو هو.
هن چيو ته آئين جي منظوري خلاف هڪ ووٽ به نه وڌو ويو، اهي دستاويز وفاق کي ڳنڍي رکيو آهي، آئين جي مضبوطي جمهوري بنيادن سان واڳيل آهي.
جسٽس قاضي فائز عيسيٰ تفصيلي نوٽ ۾ چيو ته فرض ڪريو سپريم ڪورٽ ڪنهن قتل جو ڪيس ٻڌڻ جو فيصلو ڪري جوابدار کي سزا ڏي ٿي.
هن چيو ته سپريم ڪورٽ طرفان ان قدم جو ڪو قانوني اثر نه ٿندو، ڇاڪاڻ ته آئين ۽ قانون سپريم ڪورٽ کي فوجداري ڪيس هلائڻ جو اختيار ناهي ڏنو.
جسٽس قاضي فائز عيسيٰ چيو ته قتل جو ڪيس سيشن جج هلائي سگهي ٿو، جيڪو سپريم ڪورٽ جي ججن کان ٻه درجا هيٺ آهي.
هن چيو ته فيملي ڪورٽ جو جج مقرر قانون بابت فيصلا ڪندو، اهو اختيار سپريم ڪورٽ کي حاصل ناهي.
