وفاقي وزير شيري رحمان چيو آهي ته جنهن طريقي سان بينچ تڪرار، ورهاڱي ۽ ڏڦيڙ جو شڪار آهي، اهو اعليٰ عدليه جي ساک ۽ تاثر لاءِ سٺو ناهي.
سماجي رابطن واري ويب سائيٽ تي جاري ڪيل ٽويٽ ۾ پ پ سينيٽر شيري رحمان چيو آهي ته 9ميمبرن تي ٻڌل بينچ هاڻي ٽن ميمبرن تائين محدود ٿي وئي آهي، جنهن مان صاف ظاهر آهي ته بينچ پنهنجي اڪثريت ۽ غِير جانبداري وڃائي ويٺي آهي.
هن چيو ته فيصلي کان پهريان ئي جيڪڏهن بينچ تڪراري ٿي وڃي ته انصاف ناهي ٿيندو.
وفاقي وزير چيو ته حڪومت ۽ بار ڪائونسل جي فل ڪورٽ جي استدعا بار بار رد ٿيڻ تي ڪيترائي سوال جنم وٺي رهيا آهن، اعليٰ عدليه کي گذارش آهي ته فل ڪورٽ جوڙڻ جي درخواست تي نظر ثاني ڪئي وڃي، اهو رڳو حڪومت نه پر قوم جو مطالبو آهي.
هن چيو ته معزز ججز کي اندروني ورهاڱي ۽ تڪرار کي ختم ڪرڻ لاءِ گڏجي ويهڻ گهرجي، عدالت کي پنهنجي ساک ۽ غيرجانبداري جي تاثر کي بحال ڪرڻ جو موقع ضايع نه ڪرڻ گهرجي.
