قومپرست اڳواڻ ڊاڪٽر نياز ڪالاڻي چيو آهي ته جيئي سنڌ قومي محاذ ڪارڪنن جي پارٽي آهي، ڪنهن جي خانداني وراثت ناهي، اليڪشن ٿيڻ گهرجي.
اڏيري لال ۾ ڊاڪٽر نياز ڪالاڻي، علي نواز خشڪ ۽ رجب خشڪ جي وفات تي سندس پونيئرن منٺار خشڪ ۽ رمضان خشڪ سان تعزيت ڪرڻ بعد ميڊيا سان ڳالهائيندي چيو ته پنجاب سنڌ جي پاڻي تي ڌاڙو هنيو ويٺو آهي، ارسا ۾ سنڌ جي نمائندگي نه هئڻ تي کين پريشاني آهي.
هن چيو ته ارسا ۾ چئني صوبن جا نمائندا هئڻ گهرجن، پر افسوس اهو حق صرف پنجاب کي حاصل آهي، سنڌو درياهه سنڌي قوم جو جياپو آهي، ان کي بچائڻ لاءِ سنڌي قوم کي مزاحمت ڪرڻي پوندي.
سندس چوڻ هو ته سنڌ کي هميشه پاڻي جي معاملي ۾ نظرانداز ڪيو ويو آهي، گڏجي ڪا حڪمت عملي نه جوڙي وئي ته سنڌ پاڻي جي ڦڙي ڦڙي لاءِ تڙپندي ۽ اهڙو عمل هرگز برداشت نه ڪيو ويندو.
ڊاڪٽر نياز ڪالاڻي چيو ته بشير خان قريشي جي دور ۾ پارٽي وڌيڪ طاقتور ۽ منظم هئي، هن وقت پارٽي ۾ چونڊن جي سخت ضرورت آهي ته جيئن ڪارڪنن کي ووٽ جو حق به ملي ۽ پنهنجو اڳواڻ به چونڊي سگهن.
