صحافين، ليکڪن ۽ سول سوسائٽي جي تنظيم جي ڊبليو سي پروفيسر ڊاڪٽر اجمل ساوند جي قتل ۽ قبيلائي جهيڙن خلاف 11 اپريل کان احتجاجي تحريڪ هلائڻ جو اعلان ڪري ڇڏيو آهي، پهرين مرحلي تي ڪنڌڪوٽ ۽ سمورن ڊويزنل هيڊ ڪوارٽر شهرن ۾ احتجاجي مظاهرا ڪيا ويندا.
جي ڊبليو سي مرڪز پنهنجي جاري ڪيل هڪ بيان ۾ تحريڪ هلائڻ جو اعلان ڪندي چيو آهي ته سنڌ ۾ قبيلائي جهيڙا ناسور بڻجي ويا آهن، پروفيسر اجمل ساوند جو قتل سنڌ جي شعور تي ڪاري ضرب آهي، سرداري توڙي ڀوتارڪي نظام سنڌ جي شعور کي مفلوج ڪري ڇڏيو آهي.
جي ڊبليو سي جي مرڪزي صدر ذوالفقار خاصخيلي ۽ ٻين اڳواڻن جو بيان ۾ وڌيڪ چوڻ ھو ته پروفيسر ڊاڪٽر اجمل ساوند جو ناحق سنڌ کي شعوري طور پوئتي ڌڪڻ جي سازش آهي.
ان سلسلي ۾ جي ڊبليو سي جي سرپرست اعليٰ ڊاڪٽر عبدالڪريم راڄپر جي هدايتن ۽ مرڪزي ڪميٽي جي غور ويچار کان پوءِ سنڌ جي سمورن ڊويزنل هيڊ ڪوارٽرن ۾احتجاج جو شيڊول جوڙيو ويو آهي.
جي ڊبليو سي پاران 11 اپريل تي شهيد بينظير آباد، 15 اپريل تي ڪنڌڪوٽ ۽ 16 اپريل تي سکر ۾ احتجاجي مظاهرا ڪيا ويندا.
جي ڊبليو سي پاران 17 اپريل تي لاڙڪاڻي، 18 اپريل تي ميرپورخاص ۽ 19 اپريل تي حيدرآباد ۾ احتجاجي مظاهرا ڪيا ويندا.
جي ڊبليو سي پاران عيدالفطر کانپوءِ ڪراچي ۾ احتجاجي مظاهرو ڪيو ويندو.
جي ڊبليو سي جي مرڪزي صدر ذوالفقار خاصخيلي، جنرل سيڪريٽري شوڪت نوناري، نائب صدر ظفر ابڙي، نظير پنهور، ظفر هڪڙي، اظهر گل سرڪي ۽ ٻين چيو ته سنڌ ۾ قبيلائي جهيڙا ناسور بڻجي ويا آهن، پروفيسر ڊاڪٽر اجمل ساوند جو قتل سنڌ جي شعور تي ڪاري ضرب آهي.
هنن چيو ته سنڌ ۾ بدبودار سرداري توڙي ڀوتارڪي نظام سنڌ جي شعور کي مفلوج ڪري ڇڏيو آهي، شهيد ناظم جوکيو جي قتل کان وٺي شهيد اجمل ساوند جو قتل سنڌ جي شعور جو قتل آهي.
