حيدرآباد ۾ صحافين، ليکڪن ۽ سول سوسائٽي جي تنظيم جي ڊبليو سي پاران پروفيسر ڊاڪٽر اجمل ساوند جي قاتلن جي گرفتاريءَ ۽ قبيلائي جهيڙن خلاف احتجاجي ريلي ڪڍي ڌرڻو هنيو ويو.
جي ڊبليو سي جي مرڪزي صدر ذوالفقار خاصخيلي، نائب صدر ظفر ابڙي، مرڪزي جنرل سيڪريٽري شوڪت نوناري، ظفر هڪڙو، فهيم ٻٻر، نياز وگهيو، فيروز ٻٻر ۽ ٻين جي اڳواڻيءَ ۾ ريلي ڪڍي پريس ڪلب آڏو ڌرڻو هڻي نعريبازي ڪئي وئي.
ڌرڻي ۾ صحافين، اديبن، دانشورن ،سياسي، سماجي تنظيمن، سول سوسائٽي ۽ شهرين پاران وڏي انگ ۾ پاران شرڪت ڪئي وئي.
ريلي ۾ سنڌي لينگويج اٿارٽي جي چيئرمين ڊاڪٽر اسحاق سميجو، مهراڻ يونيورسٽي جي اڳوڻي وائيس چانسلر پروفيسر اسلم عقيلي، هاءِ ڪورٽ بار حيدرآباد جي صدر ايڊووڪيٽ يوسف لغاري ۽ وومين چيمبر آف ڪامرس اينڊ انڊسٽريز جي صدر شاهده ٽالپر شرڪت ڪئي.
ريلي ۾ علامتي ڪفن پائي ۽ پاڻ کي زنجيرن ۾ جڪڙي احتجاج ڪيو ويو.
ان موقعي تي اڳواڻن جو چوڻ هو ته ڊاڪٽر اجمل ساوند جو قتل سموري شعور جو قتل آهي.
هنن چيو ته ، قبيلائي جهيڙن سبب سنڌ جا ڪيترائي نوجوان قتل ٿي چڪا آهن، ڊاڪٽر اجمل ساوند جو قتل به قبيلائي تڪرارن جو نتيجو آهي.
اڳواڻن جو چوڻ هو ته فرانس مان پي ايڇ ڊي ڪري موٽندڙ پروفيسر ڊاڪٽر اجمل ساوند جو قتل جهالت جي انتها آهي، قبيلائي تڪرارن جي ڪري نئين نسل کي تباهه ڪيو پيو وڃي.
اڳواڻن مطالبو ڪيو ته ڊاڪٽر اجمل ساوند جي قتل ۾ ملوث ڪردارن کي انجام تائين پهچايو وڃي.
