حڪومت اعليٰ عدليه بابت نئين آڊيو جي فارنزڪ آڊٽ ۽ پاڻمرادو نوٽيس وٺڻ جو مطالبو ڪري ڇڏيو، وفاقي گهرو وزير راڻا ثناءَ الله جو چوڻ آهي ته اعليٰ عدليه بابت نئين آڊيو ليڪ تي حڪومت کي ڳڻتي آهي، نئين آڊيو بابت پاڻمرادو نوٽيس وٺي فارنزڪ آڊٽ ڪرائڻ گهرجي.
فيصل آباد ۾ ميڊيا سان ڳالهائيندي راڻا ثناءَ الله چيو ته ججن جا گهر وارا عدالتي فيصلن تي اثرانداز ٿي رهيا آهن.
هن چيو ته اعليٰ عدليه بابت ڳالهين جي آڊيو رڪارڊنگ ڪندڙ کي سزا ڏني ويندي پر ضد ۽ انا تحت فيصلا نه ٿيڻ گهرجن.
سندس چوڻ هو ته اعليٰ عدليه بابت آڊيو ليڪ تي حڪومت کي تمام گهڻي ڳڻتي آهي.
وفاقي گهرو وزير راڻا ثناءَ الله چيو ته نئين آڊيو بابت پاڻمرادو نوٽيس وٺي فارنزڪ آڊٽ ڪرائڻ گهرجي.
هن چيو ته تحريڪ انصاف اڳواڻن جي ڳالهين تي هر پاڪستاني جي ذهن ۾ ڳڻتي آهي.
سندس چوڻ هو ته هڪ جج کي هدايتون ڏنيون پيون وڃن ته پي ٽي آءِ جي حق ۾ فيصلو ڪيو وڃي.
هن چيو ته هڪ حاضر سروس جي جج جي پٽ ۽ نياڻي بابت عام آهي ته اهي پي ٽي آءِ جا سرگرم ڪارڪن آهن.
سندس چوڻ هو ته گهريلو عورتون جڏهن ماڻهن کي غداري لاءِ ڀڙڪائينديون ته پوءِ شيون ڪيئن اڳتي وڌنديون، اهڙين ڳالهين کي گهريلو ڳالهه ٻولهه نه ٿو قرار ڏئي سگهجي.
راڻا ثناءَ الله چيو ته دنيا ڏسي رهي آهي ته پاڪستان ۾ ڪهڙي قسم جو عدالتي نظام آهي.
هن چيو ته جمهوريت ۾ اختلاف راءِ جو احترام ڪيو ويندو آهي، عمران خان خلاف ڪو غلط ڪيس داخل نه ڪيو ويو آهي.
سندس چوڻ هو ته حڪومت چاهي ها ته عمران خان خلاف موت جي سزا وارا ڪيس ٺاهي پئي سگهي.
وفاقي گهرو وزير چيو ته مهانگائي سبب سرڪاري ۽ خانگي ادارن جي ملازمن جي پگهارن ۾ اضافو ٿيڻ گهرجي.
راڻا ثناءَ الله چيو ته مسلم ليگ ن اليڪشن کان ڀڄڻ نه ٿي چاهي، هو چاهين ٿا ته عام چونڊون پنهنجي وقت تي ٿيڻ گهرجن.
هن چيو ته عام چونڊون ٿينديون مسلم ليگ ن جي قيادت نواز شريف ئي ڪندو.
