حڪومت امڪاني هيٽ ويو کي منهن ڏيڻ ۽ نقصان کان بچڻ لاءِ صوبن کي ايس او پيز جاري ڪري ڇڏيون، وفاقي وزير شيري رحمان جو چوڻ آهي ته هر سال هيٽ ويو سبب قيمتي زندگين، زراعت ۽ معيشيت سان گڏ ٻيا نقصان ٿيندا آهن، نقصانن کان بچاءَ لاءِ انتظاميا سان گڏ شهرين کي به اڳواٽ قدم ۽ احتياطي اپاءَ وٺڻ گهرجن.
جاري ڪيل بيان ۾ شيري رحمان چيو ته گرميءَ جي موسم ۾ امڪاني هيٽ ويو جي انتظامن بابت صوبن کي ضروري ايس او پيز جاري ڪيون آهن.
سندس چوڻ هو ته هر سال هيٽ ويو سبب قيمتي زندگين، زراعت ۽ معيشيت سان گڏ ٻيا نقصان ٿيندا آهن، نقصانن کان بچاءَ لاءِ انتظاميا سان گڏ شهرين کي به اڳواٽ قدم ۽ احتياطي اپاءَ وٺڻ گهرجن.
وفاقي وزير شيري رحمان چيو ته هيٽ ويو بابت انتظامي ايس او پيز ماحولياتي تبديلي بابت وزارت جي ٽاسڪ فورس جوڙيون آهن، ايس او پيز ۾ سمورن صوبن ۽ ڀائيوارن سان صلاح مشورا ڪيا ويا.
هن چيو ته ضلعي ۽ صوبائي اختيارين سميت لاڳاپيل ادارا هيٽ ويو بابت تياريون شروع ڪري ڇڏين.
وفاقي وزير شيري رحمان چيو ته صوبن کي يوسي سطح تي هيٽ ويو ريسپانس سينٽرز قائم ڪرڻ سان گڏ ڄاڻ ۽ ڪوششن لاءِ قومي سطح جو ڪنٽرول روم قائم ڪرڻ جي به سفارش ڪئي آهي، ايس او پيز ۾ هيٽ ويو کي منهن ڏيڻ لاءِ عوامي آگاهي جي مهم سان گڏ ٻيون سفارشون شامل آهن.
