روس هلندڙ مهيني جي آخر ۾ برڪس سربراهي اجلاس کان اڳ اولهندي ملڪن جي سياسي  دٻاءُ جو مقابلو ڪرڻ لاءِ آءِ ايم ايف جو متبادل جوڙين

هلندڙ سال برڪس گروپ جي سربراهي ڪندڙ روس پنهنجن ڀائيوارن کان مطالبو ڪيو آهي ته هو هلندڙ مهيني جي آخر ۾ برڪس سربراهي اجلاس کان اڳ اولهندي ملڪن جي سياسي  دٻاءُ جو مقابلو ڪرڻ لاءِ آءِ ايم ايف جو متبادل جوڙين. برڪس ۾ برازيل، روس، ڀارت ۽ چين شامل آهن، جڏهن ته ڏکڻ آفريڪا، مصر، ايٿوپيا، ايران ۽ گڏيل امارات  کي شامل ڪرڻ لاءِ برڪس جو دائرو وڌايو ويو آهي. سعودي عرب کي ان گروپ ۾ شامل ٿيڻ جي دعوت ڏني ويئي آهي پر ان اڃا تائين ميمبرشپ حاصل نه ڪئي آهي. برڪس جا فنانس ۽ مرڪزي  بينڪ جا اعليٰ عملدار هلندڙ هفتي ماسڪو ۾ ملاقات ڪندا. اجلاس جي ميزباني ڪندڙ روسي ناڻي واري وزير انتون سلوانوف چيو آهي ته عالمي مالياتي نظام اولهندي ملڪن جي ڪنٽرول ۾ آهي، برڪس جيڪو عالمي معيشت جو 37 سيڪڙو نمائندگي ڪري ٿو، ان کي آءِ ايم ايف جو متبادل پيدا ڪرڻ جي ضرورت آهي. سلوانوف جو چوڻ آهي ته آءِ ايم ايف ۽ ورلڊ بينڪ برڪس ملڪن جي مفادن لاءِ ڪم نه ڪري رهيا آهن، ان ڪري نئون ادارو جوڙڻ ضرورت آهي.