پاڪستان شوبز جي خوبصورت اداڪارا سجل علي هڪ ڀيرو ٻيهر بالي ووڊ فلمن ۾ ڪم ڪرڻ جي خواهش ظاهر ڪري ڇڏي آهي.
ڀارتي ميڊيا سان ڳالهائيندي اداڪارا سجل علي سرحد پار جي فنڪارن سان گڏ ڪم ڪرڻ جي حوالي سان پنهنجو تجربو ٻڌائيندي چيو ته هنن ۾ هڪ پنهنجائپ آهي ۽ هوءَ ڀارت ۾ گهر جيان محسوس ڪندي آهي.
اداڪارا جو چوڻ هو ته هوءَ بالي ووڊ جي فلمن ۾ ٻيهر ڪم ڪرڻ چاهي ٿي ۽ هوءَ گهڻي عرصي کان اها ڳالهه چئي رهي آهي، سياست کي فن ۽ فنڪارن جي وچ ۾ نه اچڻ گهرجي.
اداڪارا سجل علي جو چوڻ هو ته کيس اميد آهي ته پاڪستان ۽ هندستان وچ ۾ اها ڀت جلد ختم ٿي ويندي، هن ڀارتي ليجنڊ سري ديوي سان گڏ فلم “موم” ۾ ڪم ڪيو هو، سري ديوي سندس لاءِ ماءُ کان گهٽ نه هئي.
اداڪارا سجل علي افسوس جو اظهار ڪندي چيو ته هوءَ سري ديوي جي ويجهو هئي، بدقسمتي سان هوءَ کين گهڻو جلدي ڇڏي هلي وئي، هن ڪڏهن به پنهنجي رشتي جي باري ۾ ڳالهه نه ڪئي پر کيس اڄ اهو چوڻو پئجي رهيو آهي ته اهو واقعي بدقسمتي جي ڳالهه آهي ته هو فنڪار طور ٻنهي ملڪن جي تڪرار ۾ ڦاسي ويا آهن.
واضح رهي ته 29ورهين جي اداڪارا سجل علي 2017ع ۾ اداڪارا سري ديوي سان گڏ فلم “ موم” ۾ ڪم ڪيو هو جنهن بعد هن جمائمه گوڊ سمٿ جي فلم “واٽس لوَ گاٽ ٽو ڊو وٿ اٺ” سان هالي ووڊ ۾ به ڊيبيو ڪيو آهي.
