عوامي مسلم ليگ جي سربراهه شيخ رشيد احمد چيو آهي ته اسٽيٽ بئنڪ پئسا جاري ڪري ٿي يا نه اڄ خبر پئجي ويندي جيڪڏهن اسٽيٽ بئنڪ اليڪشن ڪميشن کي رقم نه موڪلي حڪم جي ڀڃڪڙي ڪري ٿي ته شروعات اسٽيٽ بئنڪ کان ئي ڪئي ويندي، هي جيلن جي سيخن پٺيان هوندا يا عوام جي عدالتن ۾ هوندا ان جي به خبر پئجي ويندي.
سماجي رابطن واري ويب سائيٽ ٽوئيٽر تي جاري ڪيل ٽوئٽ ۾ شيخ رشيد چيو ته سراج الحق جون ڳالهيون حقيقت تي ٻڌل آهن ته سٺي ڳالهه آهي، هاڻي ته زلمي خليل زاد به مسٽر ٽين پرسنٽ تي ٺپو لڳائي ڇڏيو آهي.
سندس چوڻ هو ته نيب جا ڪيس سپريم ڪورٽ ۾ طلب ڪيا ويا آهن انشاءَ الله سپريم ڪورٽ نيب ترميمن کي ڪالعدم قرار ڏيندي.
عوامي مسلم ليگ جي سربراهه شيخ رشيد چيو ته عدليا کي ڌمڪيون به ڏنيون پيون وڃن، غير اخلاقي مهم به هلائي پئي وڃي جيڪڏهن قومي اسيمبلي نه ٽوڙي وئي ته صوبائي اسيمبلين جون چونڊون پنهنجي وقت تي ئي ٿينديون.
هن چيو ته گهرو وزير جو بيان آهي ته 14 مئي تي چونڊون نه ٿينديون، عدليه جي فيصلي سري عام ڀڃڪڙي آهي.
سندس چوڻ هو ته چور دروازي کان ايندڙ پي ٽي ايم حڪومت جي اليڪشن کان گهٻرائي رهي آهي.
عوامي مسلم ليگ جي سربراهه شيخ رشيد چيو ته نگران حڪومت جا 90 ڏينهن پورا ٿي ويا آهن پوءِ هي ڪهڙي شوق ۽ اختيار تحت ويٺا آهن، پرڏيهي سيڙپڪاري ۽ پرڏيهي ايئر لائنز بند ٿي رهيون آهن.
