بالي ووڊ جي اداڪار سلمان خان جي لاءِ ھڪ ٻي ڌمڪي واري فون ڪال ممبئي پوليس کي ملي آھي جنھن ۾ ھڪ شخص اداڪار کي جلد قتل ڪرڻ جي ڌمڪي ڏئي رھيو آھي.
ڀارتي نيوز ايجنسي موجب، گذريل ڏينھن ممبئي جي مين پوليس ڪنٽرول روم ۾ پوليس کي ڪال ملي جنھن ۾ ھڪ شخص چيو تھ ھو سلمان خان کي 30 اپريل تي قتل ڪري ڇڏيندو.
رپورٽ موجب فون ڪال بعد پوليس تيڪنيڪي مدد سان فون ڪال جي خبر لڳائي جنھن موجب ڪال ممبئي کان 70 ڪلوميٽر پري جي علائقي مان ڪئي وئي ھئي.
ڀارتي پوليس موجب ڪال 16 ورھين جي ھڪ نينگر ڪئي ھئي جنھن کي حراست ۾ ورتو ويو آھي، نينگر جو تعلق راجسٿان جي شھر جوڌپور سان آھي، وڌيڪ قانوني ڪارروائي ۽ نينگر کان پڇاڳاڇا ڪئي پئي وڃي.
ڀارتي ميڊيا موجب سلمان خان کي گذريل مھيني ھڪ اي ميل ذريعي بھ قتل ڪرڻ جي ڌمڪي ڏني وئي ھئي جنھن بعد سندس سڪيورٽي وڌائي وئي ھئي.
