سلمان خان جي ايندڙ فلم “ڪسي کا ڀائي، ڪسي ڪي جان” سان بالي ووڊ ۾ قدم رکندڙ اداڪارا پلڪ تيواري انڪشاف ڪيو آهي ته سلمان خان جي طرفان فلم جي سيٽ تي عورتن جي ڪپڙن بابت ڪجهه اصول ٺاهيا ويا هئا.
پلڪ تيواري ڀارتي ٽيليويزن جي مشهور ۽ ناليواري اداڪارا شوئيتا تيواري جي ڌي آهي جيڪا جلد سلمان خان جي فلم ۾ ڊيبيو ڪرڻ وڃي رهي آهي، ان کان اڳ پلڪ تيواري گلوڪار هارڊي سنڌو جي گاني بجلي بجلي ۾ نظر آئي ۽ کيس تمام گهڻي موٽ ملي.
دلچسپ ڳالهه اها آهي ته اداڪارا پلڪ تيواري سلمان خان سان گڏ فلم انتم ۾ اسسٽنٽ ڊائريڪٽر طور ڪم ڪري چڪي آهي.
هڪ انٽرويو ۾ اداڪارا پلڪ تيواري چيو ته جڏهن هوءَ سلمان خان سان ڪم ڪري رهي هئي ته هن سيٽ تي ڇوڪرين جي ڪپڙن بابت ڪجهه اصول ٺاهيا هئا جنهن تي سختي سان عمل ڪرايو ويندو هو.
اداڪارا چيو ته سلمان خان اصول ٺاهيو هو ته سيٺ تي ڪا به ڇوڪري اڻوڻندڙ ڪپڙا نه پائيندي، نه ئي اهڙا ڪپڙا پائيندي جنهن سان سندس گهڻو جسم ظاهر ٿئي.
پلڪ چيو ته سلمان خان چاهي ٿو ته ڇوڪرين کي هميشه محفوظ رکڻ گهرجي ۽ ڪو به کين نقصان نه پهچائي.
