سنڌ جي مختلف شهرن ۾ روڊ حادثن جي نتيجي ۾ مدرسي جي چئن کٿابين ۽ هڪ عورت سميت 6 ڄڻا فوت ٿي ويا جڏهن ته هڪ عورت سميت 5 ماڻهو زخمي ٿي پيا.
ٽنڊي الهيار ۾ روڊ حادثي جي نتيجي مدرسي جي چئن کٿابين سميت 5 ڄڻا فوت ٿي ويا آهن.
باءِ پاس تي سبزي منڊي وٽ موٽرسائيڪل ۽ ڪوچ ۾ ٽڪر ٿي پيو.
حادثي جي نتيجي ۾ مدرسي جي چئن کٿابين سميت پنج ڄڻا فوت ٿي ويا.
حادثي بعد فوت ٿيل پنجن ڄڻن جا مڙهه اسپتال منتقل ڪيا ويا جتي سندس سڃاڻپ لال بخش خاصخيلي، خدا بخش خاصخيلي سندس ٻن پٽن عبدالرحيم ۽ سڪندر خاصخيلي طور ٿي.
پوليس جو چوڻ آهي ته حادثي جو شڪار ٿيل ڳوٺ صالح خاصخيلي جا رهواسي هئا جيڪي عيد جون موڪلون ملهائڻ ڳوٺ وڃي رهيا هئا.
پوليس موجب، حادثو تيز رفتاري سبب پيش آيو وڌيڪ جاچ ڪئي پئي وڃي.
نوري آباد ويجهو روڊ حادثي جي نتيجي ۾ هڪ عورت فوت ۽ هڪ عورت سميت 5 ڄڻا زخمي ٿي پيا.
موٽر وي تي تيز رفتار ڪار ۽ ٽرڪ ۾ ٽڪر ٿي پيو.
حادثي جي نتيجي ۾ اشرف خاتون ٿڏي تي ئي فوت ٿي وئي جڏهن ته جواد، ابراهيم، مسمات جليلان، ايمان فاطمه ۽ اياز ڄامڙو زخمي ٿي پيا.
حادثي بعد فوتي عورت جو لاش ۽ زخمين کي اسپتال منتقل ڪيو ويو جتان ضروري ڪارروائي بعد مڙهه وارثن حوالي ڪيو ويو.
پوليس جو چوڻ آهي ته حادثو تيز رفتاري سبب پيش آيو جڏهن ته حادثي جو شڪار خاندان ڪراچي کان گمبٽ وڃي رهيو هو.
