سنڌ سميت سڄي دنيا ۾ پورهيتن جو ڏهاڙو اڄ ملهايو پيو وڃي.
مزدورن کي ڀيٽا پيش ڪرڻ لاءِ ملڪ جي مختلف شهرن ۾ ريليون ڪڍي تقريبون ڪوٺايون وينديون، جڏهن ته اڄ سڄي ملڪ ۾ عام موڪل آهي.
صدر عارف علوي ۽وزيراعظم شهباز شريف پورهيتن کي خراج تحسين پيش ڪيو آهي.
صدر عارف علوي پنهنجي جاري پيغام ۾ چيو آهي ته اڄ جو مزدور گھٽ اجرت، غير محفوظ ماحول سميت ڪيترن ئي مسئلن کي منهن ڏيئي رهيو آهي.
هن چيو ته پاڪستان وٽ وڏي ليبر فورس ۽ نوجوانن جو انگ آهي، جديد هنر فراهم ڪرڻ جي ضرورت آهي، وفاقي ۽ صوبائي حڪومتون سندن ڀلائي ۽ بهتري لاءِ قدم کڻي ۽ هنر فراهم ڪرڻ جون ڪوششون ڪري.
هوڏانهن وزيراعظم شهباز شريف چيو آهي ته سڄي دنيا ۾ اڄ مزدورن جو عالمي ڏينهن ملهايو پيو وڃي، ان ڏينهن تي سموري قوم پورهيت طبقي کي خراج تحسين پيش ڪري ٿي.
وزيراعظم چيو ته قوم ملڪ جي ترقي ۾ مزدورن جي ڪردار ۽ سهڪار کي ساراهي ٿي، اسلام سماجي انصاف، برابري ۽ انساني حقن جي احترام جي اصولن تي زور ڏئي ٿو.
هن چيو ته اسلام عالمي قانونن کان گھڻو اڳ ئي پورهيتن جي حقن بابت اصول طئي ڪيا هئا.
وزيراعظم چيو ته موجوده حڪومت مزدورن جي ڪم ۽ زندگي جي حالتن کي بهتر بڻائڻ لاءِ پرعزم آهي.
وزيراعظم چيو ته حڪومت مزدورن جي گهٽ ۾ گهٽ اجرت 17 هزار 500 رپين مان وڌائي 25 هزار رپيا ماهوار ڪئي آهي، حڪومت مزدورن جي ڀلائي جي ادارن لاءِ هڪ خودڪار ۽ مربوط نظام ٺاهڻ تي ڪم ڪري رهي آهي.
شهباز شريف وڌيڪ چيو ته موجوده حڪومت ووڪيشنل ٽريننگ ۽ اسڪل ڊولپمينٽ پروگرام شروع ڪيا آهن، ڪنهن به ملڪ جي معاشي ترقي لاءِ ليبر جو ڪردار اهم هوندو آهي.
