سنڌ پوليس ڪچي ۾ ڌاڙيلن خلاف آپريشن وڌيڪ تيز ڪرڻ جو فيصلو ڪيو آهي.
لاڙڪاڻو ڪنڌڪوٽ ڪشمور شڪارپور ۽ سکر ڊويزن جي پوليس عملدارن جو اعلي سطحي اجلاس آءِ جي سنڌ غلام نبي ميمڻ جي صدارت هيٺ لاڙڪاڻي ۾ ٿيو.
اجلاس ۾ ٻنهي ڊويزنن جي ڊي آءِ جيز ۽ ٻنهي ڊويزنن جي سمورن ضلعن جي ايس ايس پيز شرڪت ڪئي.
آءِ جي سنڌ کي سکر ۽ لاڙڪاڻي ۾ امن مان جي صورتحال بابت بريفنگ ڏني وئي، جڏهن ته ڪچي ۾ پوليس آپريشن باوجود اغوا جون وارداتون ٿيڻ ۽ ٻين معاملن تي غور ڪيو ويو.
اجلاس ۾ ڌاڙيلن جي خاتمي ۽ اغوا توڙي ڏوهاري وارداتن جي روڪٿام لاءِ قطعي رٿابندي ڪئي وئي ۽ گهوٽڪي توڙي ڪشمور ڪنڌڪوٽ ۽ شڪارپور سکر جي ڪچي وارن علائقن ۾ گڏيل حڪمت عملي جوڙي هڪ ئي وقت آپريشن شروع ڪيو ويندو.
آپريشن ۾ پوليس جي ڪمانڊوز توڙي اسپيشل يونٽن جي سکيا حاصل ڪيل اهلڪارن کي ميدان ۾ لاٿو ويندو.
ذريعن موجب آءِ جي سنڌ غلام نبي ميمڻ فيصلو ڪيو آهي ته هر حالت ۾ آپريشن ڪري ان کي ڪامياب ڪيو وڃي ته جيئن ڏوهارين جو خاتمو اچي سگهي جڏهن ته مغوين جي بازيابي لاءِ به ايس ايس پيز کي ٽاسڪ ڏنو ويندو ته هو بنا دير مغوين کي بازياب ڪرائڻ لاءِ پلان جوڙن ته جيئن غير يقيني واري صورتحال تي ضابطو آڻي سگهجي.
ان کان سواءِ بلوچستان پوليس سان به سهڪار ڪيو ويندو ۽ ٻنهي صوبن جي بارڊر تي پوليس چوڪيون قائم ڪري ڏوهارين جي اچ وڃ کي روڪيو ويندو جڏهن ته پنجاب پوليس پاران رحيم يار خان جي ڪچي ۾ شروع ڪيل آپريشن کان پوءِ اتان جون ڏوهاري ٽولن ڪشمور ۽ ڪنڌڪوٽ ضلعي جي ڪچي ۾ اچي پناه وٺڻ جا اطلاع به آهن جنهن جي لاءِ به حڪمت عملي جوڙي ويندي.
