سنڌ ڪابينا، سنڌ اليڪٽرڪ پاور ريگيوليٽري اٿارٽي قائم ڪرڻ لاءِ قانون جي منظوري ڏئي ڇڏي، هاڻي صوبي ۾ پيدا ٿيندڙ بجلي جي ورڇ سنڌ حڪومت ڪندي، ڪابينا الادين پارڪ جي 16 ايڪڙ زمين بي آر ٽي ريڊ لائن بس ڊپو لاءِ حاصل ڪرڻ جسٽس عبدالرسول ميمڻ ۽ ڊاڪٽر غلام رسول شاهه کي هيلٿ ڪيئر ڪمشنرز مقرر ڪرڻ جي منظوري ڏيندي اليڪٽرڪ گاڏيون خريداري لاءِ ڪميٽي قائم ڪري ڇڏي آهي.
سنڌ ڪابينا جو اجلاس وڏي وزير سيد مراد علي شاهه جي صدارت هيٺ ٿيو، جنهن ۾ 24 نقاطي ايجنڊا تي غور ڪيو ويو.
اجلاس دوران ڪابينا گذريل اجلاس جي منٽس جي منظوري ڏني.
ڪابينا اجلاس دوران صوبائي وزير شرجيل ميمڻ بي آر ٽي لائن بابت بريفنگ ڏيندي ٻڌايو ته ريڊ لائن ايشين ڊولپمينٽ بئنڪ ۽ ٻين ايجنسين جي سهڪار سان تعمير ٿي رهي آهي.
هن چيو ته بي آر ٽي ريڊ لائن جو روٽ ملير هالٽ کان ملير ڪينٽ، صفوران، يونيورسٽي روڊ ۽ نمائش کان ٽاور روڊ تائين آهي.
اجلاس بي آر ٽي ريڊ لائن بس ڊيپو لاءِ دوران ڪابينا الا دين پارڪ جي سورهن ايڪڙ ايراضي حاصل ڪرڻ جي منظوري ڏني.
شرجيل ميمڻ چيو ته بس ڊيپو تي بسن جي پارڪنگ، بس انسپيڪشن ايريا، بسن جي فلنگ اسٽيشن، ورڪشاپ ۽ واچ ٽاور قائم ڪيو ويندو.
ڪابينا بورڊ آف روينيو کي وفاقي بورڊ آف روينيو سان ڊيٽا شيئر ڪرڻ جي اجازت ڏئي ڇڏي، اها ڊيٽا شيئرنگ روينيو وڌائڻ لاءِ آهي.
سنڌ ڪابينا جسٽس عبدالرسول ميمڻ ۽ ڊاڪٽر غلام روسل شاهه کي هيلٿ ڪيئر ڪمشنر مقرر ڪرڻ جي به منظوري ڏني.
اجلاس دوران اليڪٽرڪ گاڏيون خريد ڪرڻ واري پاليسي لاءِ تجويزون ٺاهڻ جي منظوري ڏني، اليڪٽرڪ گاڏين جي خريداري لاءِ ڪميٽي قائم ڪئي وئي آهي، جنهن ۾ صوبائي وزير مڪيش ڪمار چاولا ۽ شبير بجاراڻي شامل آهن.
اجلاس بعد سماجي رابطن واري ويب سائٽ ٽوئٽر تي ٽوئٽ ڪندي سنڌ حڪومت جي ترجمان مرتضيٰ وهاب چيو ته ڪابينا سنڌ اليڪٽرڪ پاور ريگيوليٽر اٿارٽي قائم ڪرڻ لاءِ قانون جي منظوري ڏني آهي.
هن چيو ته هاڻي صوبي ۾ پيدا ٿيندڙ بجلي جي ورڇ سنڌ حڪومت ڪندي.
مرتضيٰ وهاب چيو ته سنڌ حڪومت جو اهو هڪ تاريخي فيصلو آهي، ان سان هو پنهنجي صوبي جي ماڻهن کي سستي بجلي فراهم ڪري سگهندا.
