سوڊان جي فوج ۽ پيرا ملٽري ريپڊ سپورٽ فورسز وچ ۾ چڪرين سبب گادي واري شھر خرطوم ڌماڪن سان گونجي اٿيو.
عرب ميڊيا موجب، سوڊان جي گادي واري شھر خرطوم ۾ شديد فائرنگ ۽ ڌماڪا ٻڌا ويا، فائرنگ خرطوم ۾ سوڊاني آرمي ھيڊڪوارٽرز ۽ بچاءَ واري وزارت جي آفيس جي ويجھو ٿي.
ميڊيا رپورٽس موجب، خرطوم ۾ سوڊان جي صدارتي محل جي ويجھو فائرنگ جو آواز ٻڌو ويو ۽ ايئرپورٽ مان دونھون اٿندي ڏٺو ويو، مروي ۽ بحري شھرن ۾ بھ فائرنگ جو آواز ٻڌو ويو .
سوڊان جي پيرا ملٽري ريپڊ سپورٽ فورسز جو چوڻ آھي تھ سندن ھڪ ڪئمپ تي سوڊان جي فوج حملو ڪيو، ھنن خرطوم ايئرپورٽ ۽ مروي شھر ۾ فوجي اڏي جو ڪنٽرول سنڀالي ورتو آھي.
ٻئي طرف سوڊاني فوج جي ترجمان برگيڊيئر جنرل نبيل عبداللھ جو چوڻ آھي تھ پيرا ملٽري ريپڊ فورس جا اھلڪار ملٽري ھيڊ ڪوارٽرز تي قبضي جي ڪوشش ڪري رھيا آھن ۽ خرطوم ۽ ٻين ھنڌن تي فوجي ڪئمپن تي حملا بھ ڪيا.
پرڏيھي ميڊيا رپورٽس موجب سوڊان جي مختلف شھرن ۾ ڇڪتاڻ بعد توپون ۽ بڪتربند گاڏيون روڊن تي مقرر ڪيون ويون آھن.
سوڊان ۾ امريڪي سفيرن فوج ۽ پيرا ملٽري فورسز وچ ۾ ھلندڙ چڪريون روڪڻ جو مطالبو ڪندي چيو آھي تھ سفارتي عملي سان گڏ ھڪ ھنڌ تي پناھھ ورتي آھي، جڏھن تھ روسي سفارتخاني طرفان بھ جنگ بندي جو مطالبو ڪيو ويو آھي.
