سوڊان مان پاڪستانين سميت دنيا جي ٻين ملڪن جي شهرين کي ڪڍڻ جو سلسلو جاري آهي جڏهن ته هوائي فوج جو سي 130 جهاز ٽئين مرحلي ۾ وڌيڪ 96 پاڪستانين کي کڻي ڪراچي پهچي ويو.
پاڪستاني پرڏيهي وزارت جي ٽوئيٽر اڪائونٽ تي جاري ڪيل ٽوئٽ ۾ چيو ويو آهي ته پورٽ سوڊان مان 97 پاڪستاني شهرين کي جده کان ڪراچي پهچايو ويو آهي، حڪومت ڦاٿل پاڪستانين کي حفاظت سان واپسي ۾ سهولت فراهم ڪندي رهندي.
ان کان اڳ ٻئي مرحلي ۾ هوائي فوج جو جهاز 111 پاڪستانين کي کڻي ڪراچي پهتو هو.
هوائي فوج جي ترجمان موجب، هوائي فوج پاران سوڊان ۾ ڦاٿل پاڪستان کي ڪڍڻ جو آپريشن ڪاميابي سان جاري آهي جڏهن ته ٽيون مشن به ڪاميابي سان مڪمل ڪيو ويو آهي.
هوائي فوج جي ترجمان جو چوڻ آهي ته هوائي فوج جو سي 130 جهاز ٽئين مرحلي ۾ وڌيڪ 96 پاڪستانين کي کڻي ڪراچي پهچي ويو.
هوائي فوج جي ترجمان موجب، تڪراري علائقي مان ايئر لفٽ ڪيل پاڪستانين جو انگ وڌي 355 ٿي ويو آهي.
هوائي فوج جي ترجمان جو چوڻ آهي ته هوائي فوج جي سربراهه جي هدايت تي پي اي ايف جو ٽرانسپورٽ جهازن جو ٻيڙو مڪمل پيشوراڻي صلاحيت سان پاڪستانين کي ڏيهه آڻڻ جي مشنز کي ڪاميابيءَ سان انجام ڏئي رهيو آهي.
پرڏيهي آفيس جي ترجمان ممتاز زهرا بلوچ موجب، هر پاڪستاني کي سوڊان مان محفوظ وطن واپسي ترجيح آهي.
سوڊان ۾ تيزي سان بگڙجندڙ صورتحال کي نظر ۾ رکندي بروقت ريسڪيو ڪرڻ تي پاڪستان پهچندڙ ماڻهن جي گهرڀاتين حڪومت جا ٿورا مڃيا ۽ ايئر فورس جي ڪوششن جي ساراهه ڪئي.
