سينيٽ چيئرمين صادق سنجراڻي سياسي رابطن جي شروعات ڪرڻ لاءِ ڳالهين بابت خاص ڪميٽي جوڙڻ لاءِ حڪومت ۽ مخالف ڌر کان نالا طلب ڪري ورتا، صادق سنجراڻي جو چوڻ آهي ته حڪومت ڳالهين لاءِ مدد طلب ڪئي آهي، ٻن ڏينهن اندر حڪومت ۽ مخالف ڌر ميمبرن جا نالا تجويز ڪن، ملڪ لاءِ سڀ سياسي پارٽيون متحد آهن.
سينيٽ چيئرمين صادق سنجراڻي باضابطه رابطن جي شروعات ڪندي خاص ڪميٽي جي ميمبرن لاءِ سينيٽ ۾ قائد ايوان سينيٽر اسحاق ڊار ۽ مخالف ڌر جي اڳواڻ سينيٽر ڊاڪٽر شهزاد وسيم کي خط اماڻي ڇڏيا.
خط ۾ سينيٽ چيئرمين صادق سنجراڻي چيو ته ڏهه رڪني ڪميٽي قائد ايوان ۽ مخالف ڌر جي اڳواڻ جي گڏيل ڪنوينرشپ ۾ ڪم ڪندي، ٻن ڏينهن اندر حڪومت ۽ اپوزيشن ڪميٽي لاءِ ميمبرن جا نالا اماڻين.
هن چيو ته عام چونڊن، موجوده سياسي ۽ معاشي بحران بابت سياسي ڳالهين جي شروعات ڪئي پئي وڃي.
سندس چوڻ هو ته پارليامينٽ ئي سياسي مسئلن جي حل لاءِ بهترين فورم آهي، سينيٽ سيڪريٽريٽ خاص ڪميٽي کي سندن ڪمن ۾ سهولتون فراهم ڪندي.
سينيٽ چيئرمين صادق سنجراڻي چيو ته موجوده سياسي ۽ معاشي صورتحال خاص طور سياسي طاقتن ۾ ڇڪتاڻ ظاهر ڪري ٿي ته هو سڀ گڏجي ملڪ لاءِ متحد ٿي وڃن.
هوڏانهن سينيٽ ۾ مخالف ڌر جي اڳواڻ ڊاڪٽر شهزاد وسيم، سينيٽ چيئرمين صادق سنجراڻي کي جوابي خط لکي ڇڏيو.
سينيٽ ۾ مخالف ڌر جي اڳواڻ ڊاڪٽر شهزاد وسيم خط ۾ چيو ته اوهان جو خط مليو آهي جنهن ۾ حڪومت ۽ مخالف ڌر جي ڳالهين لاءِ ڪميٽي جي نامزدگي گهري وئي آهي.
سندس چوڻ هو ته تحريڪ انصاف جي چيئرمين عمران خان ڳالهين لاءِ اعليٰ سطحي 3 رڪني ڪميٽي جوڙي آهي.
سينيٽ ۾ مخالف ڌر جي اڳواڻ ڊاڪٽر شهزاد وسيم خط ۾ چيو ته پي ٽي آءِ، شاهه محمود قريشي، فواد چوڌري ۽ علي ظفر کي نامزد ڪيو آهي، اوهان حڪومت کي تحريڪ انصاف جي نامزد ڪميٽي بابت آگاهه ڪريو.
خط ۾ وڌيڪ چيو آهي ته تحريڪ انصاف جي ڪميٽي حڪومت سان سپريم ڪورٽ جي هدايت تي چونڊن بابت ڳالهيون ڪندي جيڪڏهن حڪومت مخلص آهي ته سپريم ڪورٽ سامهون پنهنجي تجويزن ۽ ڳالهين بابت تفصيل ڏئي.
