سپريم ڪورٽ، پنجاب ۽ خيبرپختونخوا ۾ چونڊون ملتوي ڪرڻ واري ڪيس جو فيصلو محفوظ ڪري ورتو، چيف جسٽس عمر عطابنديال رمارڪس ڏنا آهن ته حڪومت چونڊن ۾ دير بابت مواد ناهي ڏنو، ملڪ سياسي ڳالهيون نه پيون ٿين، سمورو دٻاءُ وفاقي حڪومت تي آهي، هڪ ئي وقت چونڊون ڪرائڻ واري صلاح زبردست آهي.
چيف جسٽس عمر عطابنديال جي سربراهيءَ ۾ ٽي رڪني بئنچ پنجاب ۽ خيبرپختونخوا ۾ چونڊون ملتوي ڪرڻ واري ڪيس جي ٻڌڻي ڪئي.
ٻڌڻي جي شروعات کان اڳ اٽارني جنرل درخواست داخل ڪرائي ته چيف جسٽس جي سربراهيءَ ۾ ٽي رڪني بئنچ ڪيس نه ٻڌي.
پ پ جو وڪيل فاروق ايڇ نائڪ روسٽرم تي آيو، جنهن تي چيف جسٽس چيو ته اوهان ڪيس جو حصو بڻجي رهيا آهيو، ڇا اوهان بائيڪاٽ نه پيا ڪيو؟
فاروق ايڇ نائڪ چيو ته اسان بائيڪاٽ ناهي ڪيو.
چيف جسٽس چيو ته پاڻ ۾ صلاح مشورا ڪري لکت ۾ ٻڌايو، جيڪڏهن اوهان بائيڪاٽ ناهي ڪيو ته اخبارن ۾ آيو آهي ته پ پ به بائيڪاٽ ڪيو.
فاروق ايڇ نائڪ چيو ته سياسي پارٽين کي بئنچ تي اعتراض آهي، بائياٽ ناهي ڪيو.
جسٽس منيب اختر چيو ته اوهان بائيڪاٽ ڪرڻ کانپوءِ دليل ڏيڻ آيا آهيو؟ فاروق ايڇ نائڪ چيو ته سياسي پارٽيون سمجهن ٿيون ته ان تي لارجر بئنچ ٺهڻ گهرجي.
اٽارني جنرل چيو ته پهرين مارچ جو فيصلو ٽي چار جو آهي، ان تي چيف جسٽس چيو ته ان نقطي تي ڳالهائي چڪا آهيون.
اٽارني جنرل چيو ته اليڪشن ڪميشن وٽ اختيار آهي ته اها تاريخ اڳتي وڌائي، حڪومت آئين موجب هلندي آهي.
جسٽس اعجاز الاحسن چيو ته سپريم ڪورٽ فيصلو ٻڌائي چڪي هئي، فيصلي بعد اليڪشن ڪميشن ڪيئن تاريخ اڳتي وڌائي سگهي ٿي؟
چيف جسٽس چيو ته جسٽس يحيٰ آفريديءَ درخواستون رد ڪيون، جسٽس اطهر من الله درخواستون رد ناهي ڪيون.
اٽارني جنرل چيو ته جسٽس اطهر من الله جسٽس يحيٰ آفريدي جي فيصلي سان اتفاق ڪيو هو.
چيف جسٽس چيو ته جن ججن ڪيس ٻڌو ئي ناهي، انهن جو فيصلو گڏائي اڪثريتي فيصلو ڪيئن ٿو ٿي سگهي؟
هن چيو ته جسٽس فائز عيسيٰ جي فيصلي تي صحيح ڪندڙ جج پاڻ کي بئنچ کان ڌار ڪيو، اهو ڪيئن ٿو ٿي سگهي ته فيصلو لکندڙ جج جسٽس فائز عيسيٰ ڪيس ٻڌي؟
ٻڌڻي دوران بچاءَ وارو سيڪريٽري پيش ٿيو.
چيف جسٽس چيو ته حڪومت کي اهو ڪيئن اعتماد آهي ته 8 آڪٽوبر تي حالتون ٺيڪ ٿي وينديون؟
جسٽس عمر عطا بنديال، بچاءَ واري سيڪريٽري کان پڇاڻو ڪيو ته اوهان وٽ رٽائرڊ جوان گهرائڻ جو ڪو طريقيڪار آهي؟
سيڪريٽري دفاع چيو ته رٽائرڊ جوان رزرو فورس هوندا آهن.
ٻڌڻي دوران وڪيل علي ظفر قطعي دليلن ۾ چيو ته ڪي پي ۾ گورنر اليڪشن جي تاريخ ڏني آهي، ڇا اليڪشن ڪميشن گورنر جي تاريخ تبديل ڪري سگهي ٿي؟
هن چيو ته سندس نظر ۾ اليڪشن ڪميشن آئين کان مٿانهون قدم نه ٿي کڻي سگهي، مڪاني چونڊن جي تاريخ اليڪشن ڪميشن طئه ڪندي آهي.
چيف جسٽس رمارڪس ڏنا ته اهڙيون حالتون به ٿي سگهن ٿيون، جنهن سبب اليڪشن ملتوي ٿئي، وفاقي حڪومت اهڙو ڪو به مواد ناهي ڏنو، جنهن تحت چونڊون ملتوي ٿي سگهن.
هن چيو ته چونڊن ۾ آڏو رنڊڪن بابت به آگاهه ناهي ڪيو ويو،عدالت کي توازن قائم رکڻو هوندو آهي، حڪومت ۽ ٻين ڌرين جي درست مدد ناهي ملي.
چيف جسٽس چيو ته حڪومت اليڪشن ڪرائڻ تي راضپو ظاهر ناهي ڪيو، ماضيءَ ۾ عدالت اسيمبلي ٽوڙڻ وارو عمل ڪالعدم قرار ڏئي چڪي آهي.
جسٽس عمر عطا بنديال چيو ته ملڪ ۾ ڪي به سياسي ڳالهيون نه پيون ٿين، سمورو دٻاءُ وفاقي حڪومت تي آهي.
اٽارني جنرل عدالت کي ٻڌايو ته ترقياتي بجيٽ جي گهڻي بجيٽ خرچ ٿي چئي آهي، جنهن تي چيف جسٽس چيو ته اوهان کي ان بابت وضاحت ڏيڻي پوندي.
چيف جسٽس چيو ته اليڪشن ۾ ڪا بدمزگي ٿي ته سموري ڳالهه عدالت تي ايندي، آئين واضح آهي ته چونڊون ڪڏهن ٿيڻيون آهن، ڳالهين واري آپشن جو جواب ناهي آيو.
اليڪشن ڪميشن جي وڪيل عرفان قادر چيو ته اوهان ڪيئن پهريان حڪم ڏئي ڇڏيو ته اليڪشن ڪرائڻي آهي، پهريان کيس ٻڌو، پهرين مارچ جو فيصلو چار ٽي جو آهي.
هن چيو ته ڇا اوهان فيصلو ڪرڻ کان اڳ ئي ٻڌائي ڇڏيو آهي؟
چيف جسٽس چيو ته اسان ڪو به فيصلو اڳ ناهي ڪيو.
عرفان قادر چيو ته چونڊن جو معاملو اليڪشن ڪميشن تي ڇڏڻ گهرجي، گذريل ڪيترن ئي ورهين کان عام ۽ صوبائي چونڊون هڪ ئي ڏينهن ٿيون آهن.
اليڪشن ڪميشن جي وڪيل چيو ته چيف جسٽس کي درخواست آهي ته ججن وچ ۾ اندروني اختلاف ختم ڪري اتفاق راءِ پيدا ڪري.
چيف جسٽس چيو ته اوهان سوشل ميڊيا جو ذڪر ڪري رهيا آهيو، ٻه ڏينهن اڳ جسٽس فائز عيسيٰ سان ملاقات ٿي، اهو اوهان کي ٻڌائڻ جي ضرورت ناهي.
هن چيو ته ملاقات ۾ فل ڪورٽ تي ڳالهيون ٿيون، ملاقات دوران هن سمجهو ته جسٽس فائز ان فيصلي سبب فل ڪورٽ جو حصو نه ٿو بڻجي سگهي.
عرفان قادر چيو ته موجوه بئنچ ۾ جسٽس اعجاز کي شامل نه ڪيو وڃي ها ته شفافيت اچي ها.
چيف جسٽس چيو ته ڪو سبب ٻڌايو ته جسٽس اعجاز کي بئنچ ۾ ڇو شامل نه ٿيڻ گهرجي ها، مون کي نه ٿو لڳي ته پنهنجن انتظامي اختيارن تي اوهان آڏو جوابده آهيان.
عرفان قادر چيو ته اوهان مون کي نه پر قوم آڏو جوابده ضرور آهيو.
عدالت دليل مڪمل ٿيڻ بعد فيصلو محفوظ ڪري ورتو.
چيف جسثس چيو ته فيصلو ٻڌائڻ جي وقت جو اعلان بعد ۾ ڪيو ويندو.
