وزيراعظم شهبازشريف چيو آهي ته سپريم ڪورٽ جي موجوده بئنچ کان فيصلو ڪرائڻ انصاف جي گهرجن خلاف آهي، چيف جسٽس فل ڪورٽ جوڙي، پاڻ کي ڌار ڪندڙ ججن کي شامل نه ڪري فيصلو قبول ڪيو ويندو.
قومي اسيمبلي جي اجلاس کي خطاب ڪندي وزيراعظم شهبازشريف چيو ته اتحادي پارٽين جي اجلاس ۾ فيصلو ٿيو ته موجوده بئنچ تي بي اعتماديءَ جو اظهار ڪيو وڃي، بائيڪاٽ جو لفظ استعمال نه ڪيو ويو، سپريم ڪورٽ جو جج جسٽس اعجاز الاحسن پاڻ پهريان بئنچ کان ڌار ٿي چڪو هو، اهو بئنچ ۾ ڪيئن ٿو ويهي سگهي؟
شهبازشريف چيو ته سموري اتحادي حڪومت موجوده بئنچ تي بي اعتماديءَ جو اظهار ڪيو، چيف جسٽس به فل ڪورٽ ٺاهي ۽ جن ججن پاڻ کي ڌار ڪيو آهي انهن کي شامل نه ڪري ته اهڙو فيصلو سموري قوم کي قبول هوندو.
وزيراعظم چيو ته موجوده بئنچ کان فيصلو ڪرائڻ انصاف جي اصولن جي ابتڙ آهي.
