قومي اسيمبليءَ سپريم ڪورٽ جي ٽي رڪني بئنچ جو فيصلو رد ڪرڻ وارو ٺهراءُ منظور ڪري ورتو، ٺهراءَ ۾ چيو ويو آهي ته پارليامينٽ ٽي رڪني اقليتي بئنچ جي فيصلي کي رد ڪري ٿي، ايوان سياسي معاملن تي مداخلت تي ڳڻتي جو اظهار ڪري ٿو.
قومي اسيمبلي جي اجلاس دوران ايم اين اي خالد مگسيءَ پنجاب ۾ چونڊون ڪرائڻ بابت سپريم ڪورٽ جي ٽي رڪني بئنچ جو فيصلو رد ڪرڻ وارو ٺهراءُ پيش ڪيو، جيڪو ايوان اڪثريتي راءِ سان منظور ڪري ورتو.
ٺهراءُ ۾ چيو ويو ته ايوان سپريم ڪورٽ جي چئن ججن جي اڪثريتي فيصلي کي تسليم ڪندي ان تي عمل ۽ عدليا کان سياسي معاملن ۾ مداخلت کان پاسو ڪرڻ جو مطالبو ڪري ٿو.
پاس ڪيل ٺهراءَ ۾ چيو ويو ته مختلف ڌرين طرفان فل ڪورٽ جو مطالبو ڪيو ويو پر ان کي منظور نه ڪيو ويو.
ٺهراءَ ۾ چيو ويو ته چئن ججن جو اڪثريتي فيصلو نظرانداز ڪندي ٽي رڪني مخصوص بئنچ جي اقليتي راءِ مڙهي وئي، اها سپريم ڪورٽ جي پنهنجي روايتن، نظرين ۽ طريقيڪار خلاف آهي.
پاس ڪيل ٺهراءَ ۾ چيو ويو ته ٽي رڪني اقليتي بئنچ جي فيصلي کي پارليامينٽ رد ڪري ٿي ۽ اڪثريتي بئنچ جي فيصلي کي لاڳو سمجهي ٿي.
ٺهراءَ ۾ چيو ويو ته ايوان آرٽيڪل 184 ٽي تحت داخل ڪيس کي فل ڪورٽ ميٽينگ جي فيصلن تائين ٻڌڻي لاءِ مقرر نه ڪرڻ واري فيصلي کي تسليم ڪري ٿو.
ايوان ٽي رڪني بئنچ جي فيصلي کي هڪ ايگزيڪيٽو سرڪلر ذريعي روڪڻ تي ڳڻتي جو اظهار ڪري ٿو.
