سپريم ڪورٽ، پي ٽي آءِ چيئرمين عمران خان جي گرفتاريءَ کي غيرقانوني قرار ڏيندي کيس فوري طور آزاد ڪري عدالتي تحويل ۾ رکڻ جو حڪم ڏنو آهي، چيف جسٽس عمر عطا بنديال رمارڪس ڏنا آهن ته عمران خان کي جهڙيءَ ريت گرفتار ڪيو ويو ان جو دفاع ممڪن ناهي، پي ٽي آءِ چيئرمين اسلام آباد هائيڪورٽ سان ٻيهر رابطو ڪري، عدالت جيڪو فيصلو ڪري اهو قبول ڪرڻو پوندو.
سپريم ڪورٽ ۾ پي ٽي آءِ چيئرمين عمران خان جي گرفتاريءَ خلاف پي ٽي آءِ طرفان داخل ڪرايل درخواست تي ٻڌڻي ٿي.
ٻڌڻي دوران عدالت پي ٽي آءِ چيئرمين کي ساڍي چئين وڳي پيش ڪرڻ جو حڪم ڏنو.
عدالتي حڪم بعد اسلام آباد پوليس سخت سڪيورٽي ۾ پندرهن گاڏين تي ٻڌل قافلي ۾ عمران خان کي سپريم ڪورٽ پهچايو ته ٻيهر ٻڌڻي شروع ٿي.
ٻڌڻي شروع ٿي ته چيف جسٽس عمر عطا بنديال عمران خان کي روسٽرم تي گهرايو ويو.
چيف جسٽس رمارڪس ڏنا ته اوهان کي ڏسي خوشي ٿي.
سپريم ڪورٽ جي چيف جسٽس عمران خان جي گرفتاري غيرقانوني قرار ڏيندي کيس فوري طور آزاد ڪرڻ جو حڪم ڏنو.
چيف جسٽس چيو ته جڏهن هڪ شخص ڪورٽ آف لا ۾ اچي ٿو ته ملڪ عدالت آڏو سرنڊر ڪري ٿو، اسان سمجهون ٿا ته عمران خان جي گرفتاري غيرقانوني آهي، اوهان اسلام آباد هائيڪورٽ ۾ پيش ٿيو، اها جيڪو فيصلو ڪري اوهان کي قبول ڪرڻو پوندو.
هن چيو ته ذوالفقار علي ڀٽو ۽ بينظير ڀٽو جهڙا ليڊر وري ٻيهر ڪڏهن به نه ايندا، انهن جي مارجڻ تي به حالتون ڪنٽرول ۾ رهيون.
چيف جسٽس چيو ته اوهان جي گرفتاريءَ تي ملڪ ۾ وڳوڙ شروع ٿي ويا آهن، عدالت چاهي ٿي ته اوهان وڳوڙن جي پاڻ مذمت ڪريو.
جسٽس عمر عطا بنديال چيو ته هر سياستدان جي ذميواري آهي ته اهو امن امان کي يقيني بڻائي.
عمران خان چيو ته کيس هائيڪورٽ مان اغوا ڪيو ويو، اهو به نه ٻڌايو ويو ته سندس ڏوهه ڪهڙو آهي، هو ته گرفتار هو پر تشدد مظاهرن جو ذميوار ڪيئن ٿيو؟
جسٽس اطهر من الله چيو ته هڪ ليڊر ائين نه ٿو چئي سگهي ته سندس ڪارڪن جيڪو ڪن ٿا، هو ان جو ذميوار ناهي.
پي ٽي آءِ چيئرمين چيو ته کيس ڏنڊا هنيا ويا، ان کانپوءِ خبر ناهي ڇا ٿيو آهي.
هن چيو ته 27 ورهين کان پرامن رهڻ جو پيغام ڏنو آهي، سڀني کي چوي ٿو ته سرڪاري ملڪيتن کي نقصان نه پهچايو.
عمران خان چيو ته هو ملڪ ۾ ڏڦيڙ نه پر رڳو اليڪشن چاهن ٿا.
چيف جسٽس چيو ته اوهان ڳالهيون ڪريو، ان سان معاشري ۾ امن ايندو.
ٻڌڻي دوران عمران خان عدالت کي درخواست ڪئي ته کيس گهر وڃڻ جي اجازت ڏني وڃي.
چيف جسٽس چيو ته عمران خان جي سڪيورٽي يقيني بڻائڻ آءِ جي ۽ اٽارني جنرل جي ذميواري آهي، عمران خان سڀاڻي تائين سپريم ڪورٽ جي تحويل ۾ آهي.
جسٽس عمر عطا بنديال چيو ته عمران خان هن وقت سپريم ڪورٽ جي تحويل ۾ آهي، ممڪن هجي ته اسلام آباد هائيڪورٽ ۾ صبح يارهين وڳي ٻڌڻي مقرر ڪئي وئي.
هن چيو ته عمران خان سان ڏهه ماڻهو ملڻ جي اجازت هوندي، جن ۾ گهرڀاتي، وڪيل ۽ دوست شامل هوندا.
عدالت عمران خان کي پنهنجن ويجهن ماڻهن جي لسٽ فراهم ڪرڻ جي به هدايت ڪئي.
چيف جسٽس چيو ته سپريم ڪورٽ ٻه اصول طئه ڪيا آهن، عمران خان پوليس لائنز گيسٽ هائوس ۾ رهندو، اصول اهو آهي ته عدالتي اڱن ۾ ڪنهن به شهريءَ کي گرفتار نه ڪيو ويندو.
سپريم ڪورٽ جي چيف جسٽس چيو ته عدالتي اڱڻ مان گرفتاريءَ لاءِ پوليس کانسواءِ ٻي نفري بنا اجازت نه ايندي.
عمران خان بني گالا کي سب جيل قرار ڏيڻ جي درخواست ڪئي جيڪا عدالت رد ڪري ڇڏي.
چيف جسٽس چيو ته جنهن گيسٽ هائوس ۾ اوهان کي ترسايو ويو آهي، ان ج ٽي ڪمرا آهن، اتي ڳالهيون ڪيون، سمهي پئو ۽ سڀاڻي هائيڪورٽ ۾ پيش ٿيو، گيسٽ هائوس ۾ به اوهان آرام سان ئي رهندا.
