پاڪستان پيپلزپارٽي جي اڳواڻ ۽ قانوني ماھر اعتزاز احسن چيو آھي تھ سپريم ڪورٽ لکي ڇڏيو آھي تھ چونڊون 14 مئي تي ٿيڻيون آھن، چيف جسٽس جو فيصلو قطعي آھي، چونڊون انھي ڏينھن تي ٿينديون ۽ اھو ئي وزيراعظم ڪرائيندو.
حرمت آئين ۽ عدليا جي آزادي تي ڪانفرنس کي خطاب ڪندي اعتزاز احسن جو چوڻ ھو تھ پارليامينٽ ۽ عدليا جي وچ ۾ تاريخي جنگ شروع ٿي وئي آھي، سياسي جماعتون گڏ آھن، ھاڻي بئنچ ڏسي ٻڌائي سگھجي ٿو تھ فيصلو ڪھڙي سائيڊ جي حق ۾ ھوندو.
ھن چيو تھ سياسي معاملن کي پارليامينٽ ۾ رھڻ گھرجي، جڏھن تھ سياسي معاملن ۾ عدالت داخل ٿي وئي آھي، عدالت ۾ ڏار پئجي چڪا آھن، گڏجي ڪم ڪرڻ ناممڪن بڻجي ويو آھي.
اعتزاز احسن چيو تھ عدليا آئين جي تشريح ڪري ٿي تھ پارليامينٽ ترميم کڻي اچي ٿو، پارليامينٽ ترميم ڪري ٿو تھ عدليا ان جي تشريح ڪرڻ شروع ڪري ڇڏي ٿي.
ھن چيو تھ 90 ڏينھن اندر چونڊون ٿيڻ گھرجن، سپريم ڪورٽ جي فيصلي تي عمل ٿيڻ گھرجي، وزيراعظم ۽ لنڊن کان نواز شريف چون ٿا تھ ھو بئنچ کي نھ ٿا مڃين، جيڪو عدالت جو فيصلو نھ مڃيندو اھو نااھل ٿي ويندو.
ھن وڌيڪ چيو تھ جڏھن وزيراعظم کي گھرايو ويندو تھ نھ مڃڻ تي کيس سزا ٿي سگھي ٿي، يوسف رضا گيلاني جيان 5سال نااھلي جو منھن ڏسڻو پئجي سگھي ٿو.
