تحريڪ انصاف جي سينيئر اڳواڻ شاهه محمود قريشي چيو آهي ته اڄوڪو ڏينهن پاڪستان جي سياسي تاريخ جو اهم ترين ڏينهن آهي ڇاڪاڻ ته سپريم ڪورٽ نظريئه ضرورت کي هميشه لاءِ دفن ڪري ڇڏيو آهي.
سپريم ڪورٽ جي فيصلي کانپوءِ ميڊيا سان ڳالهائيندي شاهه محمود قريشي چيو ته پاڪستاني قوم کي فخر آهي ته آئين ۽ ضمير جي بنياد تي فيصلا ڪندڙ اڄ به زنده آهن.
هن چيو ته جمهوري قوتن، آئيني قوتن ۽ غير جمهوري ۽ غير آئيني قوتن ۾ فرق اڄ واضح ٿي ويو آهي، آئين جي بالادستي لاءِ ٻاهر نڪرڻ تي هو سڄي ملڪ جي وڪيلن کي مبارڪباد پيش ڪري ٿو.
شاهه محمود قريشي چيو ته اليڪشن ڪميشن کي درخواست آهي ته اڄ ته توهان آزاد ٿي ويا آهيو، هو چيف اليڪشن ڪمشنر کي مبارڪباد ڏي ٿو ته توهان جا هٿ هاڻي ٻڌل ناهن.
سندس چوڻ هو ته هو تحريڪ انصاف جي سمورن ڪارڪنن ۽ تنظيمن کي چوي ٿو ته اُهي سڄي ملڪ ۾ پکڙجي وڃن ۽ اليڪشن جي تياري ڪن.
پي ٽي آءِ اڳواڻ چيو ته تحريڪ انصاف جا ڪارڪنو تيار ٿي وڃو، توهان کي ٻيهر عمران خان کي وزيراعظم بڻائڻو آهي.
ان موقعي تي ڳالهائيندي بئريسٽر علي ظفر چيو ته عدالت جي فيصلي مان پوري قوم کي وڏي خوشخبري ملي آهي، اڄ عدالت مان آئيني فيصلو آيو آهي، عدالت اليڪشن جي تاريخ کي ڪالعدم قرار ڏئي ڇڏيو آهي، عدالت جي فيصلي تي عمل ڪيو وڃي.
علي ظفر چيو ته خيبرپختونخوا ۾ چونڊن بابت في الحال ڪوبه حڪم ناهي، عدالت پنجاب ۾ چونڊن جي تاريخ بابت فيصلو ڏنو ويو آهي.
