بچاءَ واري وزير خواجه آصف چيو آهي ته سپريم ڪورٽ ڪوشش ڪري رهي آهي ته حڪومت مدو پورو نه ڪري، وزيراعظمن جا ڪنڌ وڍڻ جو رواج ختم ٿيڻ گهرجي، کين پنهنجي وزيراعظم جو تحفظ ڪرڻو پوندو، وزيراعظم ڪنهن به پارٽيءَ جو هجي ان جي قربانيءَ کي روڪڻ گهرجي، ملڪي نظام ۾ عوامي نمائندن جي مينڊيٽ جو ڪو به متبادل ناهي، پاڪستان ٺهڻ جيترن ججن ۽ آمرن جيڪو ڪجهه ڪيو، اهو ان جو رڪارڊ گهريو وڃي، سڀني جو رڪارڊ قوم آڏو آندو وڃي، سپريم ڪورٽ کان به ججن جا اختلافي نوٽ ۽ بئنچ کان ڌار ٿيڻ جو رڪارڊ گهريو وڃي.
قومي اسيمبلي جي اجلاس ۾ اعتراض واري نقطي تي ڳالهائيندي بچاءَ واري وزير خواجه آصف چيو ته عوامي نمائندا ڪروڙين ووٽ کڻي پارليامينٽ پهتا آهن، پارليامينٽ جي مينڊيٽ تي سوال اٿندا رهندا آهن پر ملڪي نطام ۾ عوامي نمائندن جي مينڊيٽ جو ڪو به متبادل ناهي.
هن چيو ته 75 ورهين کان عوامي نمائندا عوام وٽ وڃي عزم ورجائيندا آهن، جنهن اداري عوام جي ايتري خدمت ناهي ڪئي، جيتري عوامي نمائندن ڪئي آهي.
خواجه آصف چيو ته عوامي ووٽن ذريعي چونڊيل نمائندي جي ڪا به شيءِ ڳجهي ناهي هوندي، ايوان جي ڪارروائي ٽي وي تي ڏيکاري ويندي آهي، پر عدالتي ڪارروائي نشر نه ٿي ڪئي وڃي.
بچاءَ واري وزير چيو ته کين سپريم ڪورٽ جو احترام آهي، سپريم ڪورٽ کي پارليامينٽ جي ڪارروائي جا منٽس ڏيڻا آهن پر اسپيڪر به سپريم ڪورٽ کان عدالتي ڪارروائي جو رڪارڊ طلب ڪري.
خواجه آصف چيو ته پنچائت لڳائڻ ۽ ڳالهيون ڪرائڻ سپريم ڪورٽ جو ڪم ناهي، کين متحد ٿي پارليامينٽ جو دفاع ڪرڻو پوندو.
هن چيو ته وزيراعظمن جا ڪنڌ وڍڻ جو رواج ختم ٿيڻ گهرجي، کين پنهنجي وزيراعظم جو تحفظ ڪرڻو پوندو، وزيراعظم ڪنهن به پارٽيءَ جو هجي ان جي قربانيءَ کي روڪڻ گهرجي.
خواجه آصف چيو ته ماضيءَ ۾ وزيراعظمن کي گهر موڪليو ويو، نوازشريف کي سڄي عمر لاءِ نااهل ڪيو ويو، هاڻي جي ججن جي تاريخ جو حساب ڏنو وڃي.
بچاءَ واري وزير چيو ته ميثاق جمهوريت بعد حڪومتن ٽي مدا مڪمل ڪيا، سپريم ڪورٽ ڪوشش پئي ڪري ته حڪومت مدو پورو نه ڪري.
خواجه آصف چيو ته پاڪستان ٺهڻ جيترن ججن ۽ آمرن جيڪو ڪجهه ڪيو، اهو ان جو رڪارڊ گهريو وڃي، سڀني جو رڪارڊ قوم آڏو آندو وڃي، سپريم ڪورٽ کان به ججن جا اختلافي نوٽ ۽ بئنچ کان ڌار ٿيڻ جو رڪارڊ گهريو وڃي.
خواجه آصف چيو ته جسٽس قاضي فائز عيسيٰ سان زيادتي ڪئي پئي وڃي، اوهان پاڻ عدليا جي عزت نه ڪندا ته ٻيو ڪير ڪيئن ڪندو؟ ڪڏهن ڪا ته ڪڏهن ڪا ڌمڪي ڏني پئي وڃي.
