پ پ چيئرمين بلاول ڀٽو زرداري چيو آهي ته ملڪ ۾ ڪنهن ٻئي جي آمريت قبول ناهي ته سپريم ڪورٽ ۾ ڪنهن به آمريت کي به تسليم نه ڪيو ويندو، ملڪ جي حڪمران ۽ وزيراعظم جو فيصلو ڪنهن جج نه پر عوام کي ڪرڻو آهي سپريم ڪورٽ فل ڪورٽ جوڙي ملڪ کي آئيني بحران مان ڪڍي ته جيئن ملڪ مضبوط ٿئي نه ته تخت لاهور جو جهيڙو ملڪ ۽ وفاق کي ٻوڙي ڇڏيندي جنهن جو نتيجو عوام ڀوڳيندو.
ڳڙهي خدا بخش ڀٽو ۾ شهيد ذوالفقار علي ڀٽو جي 44هين ورسي تقريب کي خطاب ڪندي پ پ چيئرمين ۽ پرڏيهي وزير بلاول ڀٽو زرداري چيو ته افتخار چوڌري کي پ پ جي جيالن جدوجهد ڪري بحال ڪرايو، اڳوڻي وزيراعظم يوسف رضا گيلاني کيس بحال ڪيو ته چيف جسٽس، آمر مشرف کي سزا ڏيڻ بدران آئين بچائڻ تي گيلاني کي گهر موڪلي ڇڏيو.
سندس چوڻ هو ته افتخار چوڌري کي هيرو بڻائي عدليا کي تباهه ڪيو ويو، افتخار چوڌري بعد عدليا ۾ آمريت قائم ٿي، هاڻي سپريم ڪورٽ کي سپريم ڪورٽ کان ڪير بچائيندو؟
بلاول ڀٽو زرداري چيو ته جسٽس گلزار کي وري 1950ع وارو ڪراچي شهر ڏسڻ جو شوق هو، جنهن ڪري هزارين غريبن کي بي گهر ۽ بيروزگار ڪيو ويو.
هن چيو ته راجا پرويز اشرف کي عدالت ۾ گهلي راجا رينٽل جو نالو ڏنو ويو، ملڪ جي حڪمران ۽ وزيراعظم جو فيصلو ڪنهن جج نه پر عوام کي ڪرڻو آهي.
بلاول ڀٽو زرداري چيو ته ماضي ۾ جڏهن پ پ جي ماڻهن کي آمر جي حڪومت لاءِ تبديل ڪيو ويو ته تڏهن عدالت خاموش رهي، سينيٽ ۾ فلور ڪراسنگ تي به عدالت ان کي پارليامنيٽ جو فيصلو قرار ڏنو.
پ پ چيئرمين چيو ته عدليا ڪنهن سان واعدو پورو ڪرڻ لاءِ تختِ لاهور پي ڊي ايم کان کسي پرويز الاهيءَ کي ڏنو، جنهن جي نتيجي ۾ ملڪ سياسي بحران جو شڪار آهي.
بلاول ڀٽو زرداري چيوته آئيني بحران مان نڪرڻ لاءِ سپريم ڪورٽ فل ڪورٽ بڻائي ۽ بئنچ مان انهن ٻن ججن کي ڪڍيو وڃي، جيڪي مخالفن سان فون تي ڳالهائيندي پڪڙيا ويا آهن، اليڪشن جو فيصلو ڪيو وڃي، پ پ چونڊن لاءِ تيار آهي.
هن چيو ته ملڪ ۾ ڪنهن ٻئي جي آمريت قبول ناهي ته سپريم ڪورٽ ۾ ڪنهن به آمريت کي به تسليم نه ڪيو ويندو.
پرڏيهي وزير چيوته جيڪڏهن نيت ۾ کوٽ ناهي ته فل ڪورٽ ٺاهڻ ۾ ڪهڙو مسئلو آهي، سپريم ڪورٽ فل ڪورٽ جوڙي ملڪ کي آئيني بحران مان ڪڍي ته جيئن ملڪ مضبوط ٿئي نه ته تخت لاهور جو جهيڙو ملڪ ۽ وفاق کي ٻوڙي ڇڏيندو جنهن جو نتيجو عوام ڀوڳيندو.
