سڄي ملڪ ۾ اڄ عيد الفطر مذهبي جوش ۽ جذبي سان ملهائي پئي وڃي.
سنڌ سميت سڄي ملڪ جي هر ننڍي وڏي شهر ۾ عيد الفطر ڀرپور مذهبي جوش ۽ جذبي سان ملهائي پئي وڃي.
وفاقي راڄڌاني اسلام آباد ۾ عيدالفطر جي نماز جو سڀ کان وڏو اجتماع فيصل مسجد ۾ ٿيو.
صدر عارف علوي اسلام آباد، وزيراعظم شهباز شريف لاهور ۾ عيد جي نماز ادا ڪئي.
سنڌ جي راڄڌاني ڪراچي ۾ عيد جي نماز جو سڀ کان وڏو اجتماع گلشن پولو گرائونڊ ۾ ٿيو جنهن ۾ گورنر ڪامران ٽيسوري، ايڊمنسٽريٽر ڊاڪٽر سيف الرحمان، ايم ڪيو ايم اڳواڻ عامر خان، وڏي وزير جي صلاحڪار طارق حسن سميت ڪيترن ئي ملڪن جي سفيرن ۽ شهرين وڏي انگ ۾ شرڪت ڪئي.
ان کان علاوه لاهور، پشاور، ڪوئيٽا، حيدرآباد، سکر، نوابشاهه، ميرپور خاص سميت ننڍي وڏي شهر ۾ عيدگاهن، مسجدن ۽ امام بارگاهن ۾ عيد جا وڏا اجتماع ٿيا.
عيد الفطر جي نماز کانپوءِ ملڪ جي ترقي ۽ خوشحالي لاءِ خاص دعائون گھريون ويون.
عيد الفطر جي موقعي تي اسلام آباد، ڪراچي، لاهور، پشاور ۽ ڪوئيٽا سميت ملڪ جي وڏن شهرن ۾ سڪيورٽيءَ جا انتظام پڻ سخت ڪيا ويا.
عيد گاهن، مسجدن ۽ امام بارگاهن ٻاهران پوليس توڙي قانون لاڳو ڪندڙ ادارن جا اهلڪار مقرر ڪيا ويا.
