صوبائي وزير شهلا رضا چيو آهي ته سکر جي دارالامان مان ڇوڪري جي فرار ٿيڻ واري معاملي جي جاچ ڪئي پئي وڃي، ڪنهن به عورت کي دارالامان ۾ 90 ڏينهن کان وڌيڪ نٿو رکي سگهجي.
سکر جي دارلاامان ٻاهران صحافين سان ڳالهائيندي شهلا رضا چيو ته ڪابه شيءِ پراسرار ناهي ٿيندي جيستائين ڪا ڪوتاهي نه ٿي هجي، ڇوڪري جي فرار ٿيڻ واري معاملي جي جاچ ڪئي پئي وڃي.
هن چيو ته دارالامان عملي جي کوٽ کي منهن ڏئي رهيو آهي، ڪافي عرصي کان ستين گريڊ جي سلائي سيکاريندڙ عورت اداري کي هلائي رهي هئي.
سندس چوڻ هو ته شمع کي هتي ان ڪري وٺي آيا آن، ڇاڪاڻ ته کين هڪ پڙهيل لکيل ۽ عورت جي ضرورت آهي جيڪا اداري کي بهتر نموني هلائي سگهي.
صوبائي وزير چيو ته دارالامان ۾ ڪنهن به عورت کي 90 ڏينهن کان وڌيڪ نٿو رکي سگهجي، 13 سالن تائين جي ڇوڪرين ۽ 12 سالن تائين جي ڇوڪرن کي چائلڊ پروٽيڪشن بيورو ۾ موڪليو وڃي.
هن چيو ته ڪابه ڇوڪري دارالامان مان فرار نه ٿي ٿي سگهي جيستائين اندريان ماڻهون ملوث نه هجن، ڪوريج لاءِ ايندڙ صحافين لاءِ دروازا بند ۽ فرار ٿيل ڇوڪريءَ لاءِ دروازا کوليا ويا.
سندس چوڻ هو ته تمام گهڻي ڳڻتي آهي ته هنن عورتن کي دارالامان ۾ پئسا ۽ موبائل فون ملي رهيا آهن، ان معاملي تي سنڌ جي وڏي وزير سان ملاقات ڪندي، کين ڪيترن ئي ماڻهن تي شڪ آهي ۽ هاڻي ان جو دائرو وڌائي رهيا آهن.
شهلا رضا چيو ته وومين ڊولپمينٽ کاتي کي بااختيار بڻائڻ جي ضرورت آهي، گهٽ عمر وارين ڇوڪرين کي دارالامان ۾ رکڻ لاءِ نه موڪلڻ گهرجي.
